Այսօր լրագրողների հետ հանդիպման ժամանակ ժողովրդագիր Ռուբեն Եգանյանը հայտնել է՝ որպեսզի սերունդը կարողանա իրեն պարզ չափերով վերարտադրել, ծնելիության գործակիցը պետք է լինի առնվազն 2.1: Մինչդեռ Հայաստանում այն 1.7 է։

«Հեռու չէ այն պահը, երբ մենք ավելի շատ մահեր կունենանք, քան ծնունդներ։  Այսօր կա թաքնված ապաբնակեցում, ինչը նշանակում է, որ սերունդն իրեն չի վերարտադրում»,- ասել է բանախոսը։ Ռուբեն Եգանյանը նշել է, որ մեր երկրում առայժմ կա բնական հավելաճ, «սակայն դա ժամանակավոր երևույթ է»:

«Մի քանի տարուց իրավիճակը կփոխվի, որովհետև մահերի դեպքերը ավելանում են, իսկ ծնունդներն էլ նվազում են: Մի պահ այդ երկու վեկտորները կհավասարվեն, որից հետո մահերը կգերակշռեն ծնունդներին»,-պարզաբանել է ժողովրդագիրը։

Ըստ Եգանյանի՝ մեր երկրում ծնելիության նվազման հիմնական պատճառը սոցիալ-տնտեսական խնդիրներն են, իսկ 25-30 տոկոս դեպքերում՝ արտագաղթը: