Լրահոս

22.10.2020 08:43


Շրջափակման մեջ՝ Թևանիկի դերակատարը զանգել է եղբորը. ինչ մանրամասներ է հայտնում Հովհաննես Խոդերյանի եղբայրը (տեսանյութ, լուսանկար)

Շրջափակման մեջ՝ Թևանիկի դերակատարը զանգել է եղբորը. ինչ մանրամասներ է հայտնում Հովհաննես Խոդերյանի եղբայրը (տեսանյութ, լուսանկար)

Ադրբեջանական ագրեսիան հետ մղելու ընթացքում զոհվել է ռեժիսոր Ջիվան Ավետիսյանի «Թևանիկ» ֆիլմի Թևանիկի դերակատար Հովհաննես Խոդերյանը: Այս մասին ԼՈՒՐԵՐ.com-ին հայտնեց Հովհաննեսի եղբայրը՝ Կարեն Մկրտչյանը:

«Շատ խելացի, համեստ երեխա էր: Հովոս 22 տարեկան էր, 2 տարի էր, ինչ ավարտել էր ժամկետային զինծառայությունը»,-ասաց Կարենը:

Վերջինս հայտնեց, որ երկու եղբայր տարբեր ժամանակահատվածներում են կամավորագրվել. «Միջնեկ եղբայրս ավելի վաղ էր մեկնել առաջնագիծ՝ հոկտեմբերի 4-ին, իսկ փոքրս՝ ամսի 12-ին: Այնպես ստացվեց, որ միջնեկ եղբայրս ուրիշ տեղ ընկավ, փոքրը՝ ուրիշ, բայց միջնեկ եղբայրս գնաց Հովոյիս մոտ, որ միասին լինեն»,-նշեց Հովհաննեսի եղբայրը:

Կարենը մեզ հետ զրույցում նաև ասաց, որ երկու եղբայր միասին են ընկել շրջափակման մեջ. «Երեխեն, երբ ինձ զանգեց, ասեց, որ շրջափակման մեջ են, ես արդեն գիտեի՝ ինչ է կատարվելու: Սկզբում Հովհաննեսը վիրավոր էր, ընկերը օգնեց, մի փոքր իջեցրեց Հովհաննեսին, բայց հետո, երբ իրեն էլ վիրավորեցին, ինքը գլորվեց, էլ չկարողացավ օգնություն ցույց տալ Հովհաննեսին»,-ասաց նա:

Հովհաննեսի բջջայինը ներկա պահին գտնվում է Կարենի մոտ, ինչի շնորհիվ էլ նա կարողացել է տեսնել եղբոր վերջին տեսանյութը. «Եղբորս բջջայինը մնացել էր իր վիրավոր ընկերոջ մոտ ու երբ հանդիպեցինք, այն փոխանցեց ինձ: Այդ հեռախոսի մեջ մի տեսանյութ կար, որը նկարվել էր դեպքից կես ժամ առաջ: Տեսանյութում երկու եղբայրներս են, միջնեկիս հաջողվել է, փրկվել, բայց Հովհաննեսիս՝ ոչ: Այդ տեսանյութում իրենք, կարծես, իրենց հրաժեշտի խոսքն են ասում»,-եզրափակեց Կարեն Մկրտչյանը:

86128c74793c0bba5d0b2f1e29794fc5

77153c80f8f626409011525f5ec351ff

0 00

Այս խորագրի վերջին նյութերը