Կառավարման փորձագետ Հարություն Մեսրոբյանը «7օր»–ի հետ զրույցում գնահատելով ուրբաթ օրը ՀՀ վարչապետ Տիգրան Սարգսյանի արած այն հայտարարությունը, թե մենք պետք է ոչ թե ապրանք, այլ ծառայություններ արտադրող երկիր դառնանք՝ ասել է, թե չի հասկանում նրա այդ հայտարարությունը։

–Մենք պետք է և՛ ապրանք, և՛ ծառայություններ արտադրող երկիր լինենք։ Կառավարման մեջ այսպես է՝ երբ նախապես քեզ սկսում ես սահմանափակել, այսինքն, երբ ունես 10 ճանապարհ և նախապես ասում ես, որ 7 ճանապարհով չես գնալու, ապա ցանկացած այլ պետություն, որը օգտագործելու է 10 ճանապարհը, բնականաբար, նա միշտ շահելու է,–ասել  է նա։

Մյուս կողմից, ըստ Հ. Մեսրոբյանի, այսօր Չինաստանը Եվրոպայի և ԱՄՆ–ի նկատմամբ շատ մեծ առևտրական սալդո ունի այն պատճառով, որ զարկ է տվել արտադրությանը։

–Խնդիրն այն է, որ 10–20 տարի առաջ Արևմուտքում շատ էր տարածված պոստինդուստրիալ զարգացումների փուլը։ Ասում էին, որ Արևմուտքը պետք է արտադրանքից հրաժարվի և ավելի շատ գնա ծառայությունների և այլ ոլորտներ (ի դեպ, հիմա այդ տեսությունը շատ–շատ քննադատվում է հենց Արևմուտքում, որովհետև Արևմուտքը հասկացավ, որ ինքը մեծ թակարդն ընկավ), իսկ Արևելքը՝ Չինաստանը, Հանդկաստանը, օգտագործեց այդ պահը և սկսեց զրագացնել սկզբում պրիմիտիվ, հետո զարգացած, իսկ հիմա էլ գերզարգացած, տեխնոլոգիապես հագեցած արտադրություններ։ Եվ մենք տեսանք, թե որ պետությունները ինչպես հաղթահարեցին ճգնաժամը։ Չինաստանը ճգաժամի տարիներին ամենաշատ արտադրանք արտահանող երկիրն էր,–ասել  է նա։

7or.am