-Հայաստանը ֆուտբոլային դիվանագիտությունից ի՞նչ շահեց. սահմանը փակ է, ավելի թշնամացած է հարևանների հետ, կանգնած է ղարաբաղյան պատերազմի վերսկսման վտանգի առաջ, Սերժ Սարգսյանը որ երկրում լինում է, այնտեղ անպայման ասում են, թե Ղարաբաղի խնդիրը պետք է անպայման լուծել,-լրագրողների հետ հանդիպմանը հայտարարել է «Նոր ժամանակներ» կուսակցության նախագահ Արամ Կարապետյանն ու շարունակել, թե մենք սկսեցինք մի անմիտ, շատ դժվար և խճճված գործընթաց։ Նրա կարծիքով՝ այդ գործընթացն սկսելու միտքը Հայաստանում չի մշակվել, ու խոստացել է դրան անդրադառնալ առաջիկայում։

Անդրադառնալով հայոց Ցեղասպանության բանաձևի ընդունմանը՝ բանախոսն ասել է, թե իր տպավորությամբ Ցեղասպանության ճանաչման գործընթացի քաղաքականությունը Հայաստանի և հայ ժողովրդի հետ շատ քիչ է առնչվում.

-Դա օգտագործվում է Թուրքիայի նկատմամբ գործողություններ անելու որպես պատրվակ։ Նույնը կարելի է ասել ԱՄՆ Կոնգրեսի արտաքին հարաբերությունների հանձնաժողովի մասին։ Ես տպավորություն ունեմ, նույնիսկ համոզված եմ, որ Ցեղասպանության ճանաչման հարցը չի ներառվի լիագումար նիստում։

7or.am