Ըստ թուրքական դիվանագիտական աղբյուրների՝ Մոսկվան պատրաստվում է կազմակերպել հայ և թուրք դիվանագետների հանդիպում։ Միաժամանակ նշվում է, որ հայ–թուրքական հարաբերությունների նորմալացման հարցում Անկարային կբավարարի նաև Ադրբեջանի «որոշ գրավյալ տարածքների» ազատումը։ Հիշեցնենք, որ ՌԴ նախագահ Դմիտրի Մեդվեդևի միջնորդությամբ, մարտի 5-ին կկայանա Հայաստանի և Ադրբեջանի նախագահներ Սերժ Սարգսյանի և Իլհամ Աիևի հանդիպումը, իսկ մեկ շաբաթ անց Մոսկվա կժամանի Թուրքիայի վարչապետը։

Համաձայն ՊԲ օպերատիվ տվյալների փետրվարի 13-ից 19-ը ընկած ժամանակահատվածում ղարաբաղա-ադրբեջանական հակամարտ զորքերի շփման գծում հակառակորդի կողմից, տարբեր տրամաչափի զենքերի կիրառմամբ հրադադարի ռեժիմի խախտվել է շուրջ 200 անգամ, որի ընթացքում արձակվել է ավելի քան 1000 կրակոց: Հարկ է նաև նշել, որ հրադադարի ռեժիմի խախտմանը զուգահեռ, փետրվարի 17-ին հակառակորդը հերթական անգամ դիմել է դիվերսիոն գործողության:

«Փետրվարի 20-ը 23 տարի առաջ արցախցիների կյանքում նշանավորվեց որպես համազգային միասնության ու ազատատենչ ոգու վերածննդի սկիզբ և դարձավ հիրավի համաժողովրդական տոն: Այդ օրը մենք ի լուր աշխարհի հայտարարեցինք սեփական հողի վրա ազատ ու անկախ ապրելու, ինքնիշխան ու ժողովրդավարական պետություն կառուցելու մեր վճռականության մասին: Դա մարդու իրավունքների ու ազատությունների պաշտպանության կոչ էր, խաղաղ, արդար և օրինական պահանջ...»։