Հարցազրույց «Ժառանգություն» կուսակցության վարչության փոխնախագահ Արմեն Մարտիրոսյանի հետ

–Արդյունավետ համարո՞ւմ եք «Ազատ դեմոկրատների» հետ համագործակցությունը։

–Կարծում եմ՝ արդյունավետության մասին դեռ վաղ է խոսելը, որովհետև այդ համագործակցությունը ոչ թե միտված է եղել ընտրություններին, այլ հետընտրական շրջանին։ Ընտրություններն ընդամենը այն միջոցն են, որը մեր համագործակցությունը հետագայի համար պետք է ցույց տար։ Կարծում եմ՝ հետագայի քաղաքական զարգացումները ցույց կտան, թե այդ համագործակցության արդյունավետությունը որքան է։ Այս պահին, իհարկե, դժվար է ասել ապագայի հետ կապված հարցեր, որովհետև բավականին մեծ ծավալով քաղաքական զարգացումներ են սպասվում։

–Բայց արդյոք հենց ընտրությունների արդյունքները գնահատելու հնարավորություն չե՞ն տալիս, որովհետև «Ժառանգությունը», փաստորեն, նախորդ խորհրդարանական ընտրություններին միայնակ ավելի շատ ձայն հավաքեց, քան այս անգամ՝ «Ազատ դեմոկրտաների» հետ։

–Բացարձակ թվերով այս անգամ ավելի շատ ենք հավաքել։ Իհարկե, խորհրդարանական տեղերն ավելի քիչ ստացվեցին, բայց համենայնդեպս այստեղ իր մեղավորությունը նաև ուներ ընտրացուցակների ուռճացված լինելը։ Ամեն մի ընտրությունից հետո մեզ մոտ քաղաքացիների մեծածավալ արտագաղթ է նկատվում, բայց քվեարկողների թվաքանակի մեծացում է տեղի ունենում։ Եթե թվաքանակն առավել փոքր լիներ, բնականաբար, ցուցանիշները բոլորովին այլ կլինեին։ Գումարած դրան՝ նաև այստեղ իր դերը խաղաց քաղաքական դաշտի լղոզվածությունը. վերջին պահին ընդդիմադիր այլ ներկայացուցիչների ակտիվ ջանքերի շնորհիվ ընդդիմադիր դաշտը լղոզվեց, ուստի նաև ընդդիմադիր զանգվածի արտահոսք եղավ իշխանական կուսակցություններ։ Այս ամենը, իհարկե, օբյեկտիվ ցուցանիշների մեջ են մտնում։ Նաև, ցավոք սրտի, մեր քաղաքացիների մի զգալի հատվածը հիասթափված, հուսահատ վիճակից ելնելով՝ նախընտրեց ընտրակաշառքը։ Սրանք, բնականաբար, պետք է ազդեին ընտրությունների արդյունքների վրա։

–Այդ դեպքում՝ ինչո՞ւ «Ժառանգությունը» ընտրություններից հետո դուրս չեկավ փողոց և չբողոքարկեց արդյունքները։

–Որովհետև հենց քաղաքացիներն են նաև մասնակցել այդ գործընթացներին, և դուք ինքներդ էլ տեսնում եք, որ այս պահին որևէ մեկի մոտ բողոքական տրամադրություն չկա։ Ես նորից շատ ակտիվ շփվում եմ քաղաքացիների հետ, որևէ մեկը, օրինակ, ինձ նման առաջարկով չի դիմել, թե ինչու դուրս չեք գալիս։

–Դե գոնե ձեր ընտրազանգվածը դուրս կգար՝ ի պաշտպանություն իր ձայնի։

–Խոսքս նաև մեր ընտրողների մասին է։ Մեր ընտրողներից որևէ մեկն այս պահի դրությամբ նմատատիպ ցանկություն չի հայտնել, ուստի և քաղաքական իրավիճակն այնպիսին է, որ կարծեք թե այդպիսի հոգեբանական ցանկություն մեր քաղաքացիների մոտ չկա։

–Արդարացի համարո՞ւմ եք, որ նախընտրական տեսահոլովակների ժամանակ Րաֆֆի Հովհաննիսյանը ներկայացնում էր այն կուսակցականների աշխատանքը, ոքեր իրականում համամասնական ցուցակում շատ հետին տեղերում էին։ Փաստորեն՝ ձեր անվան ներքո բոլորովին ուրիշ մարդիկ անցան խորհրդարան։

–Ես կցանկանայի, որ հաջորդ խորհրդարանական ընտրություններում ներկա խմբակցության աշխատանքի շնորհիվ ևս մենք կարողանայինք ունենալ շատ լավ քարոզարշավ, ինչպես այս անգամ ունեցանք, և կարողանայինք այս նորընտիր խմբակցության աշխատանքը հենց այդ ձևով ներկայացնել, ինչպես նախորդ խմբակցության աշխատանքը ներկայացրեցինք։

–Բայց արդարացի՞ էր դա։

–Արդարացիության խնդիր չկա։ Քաղաքական որոշում կար, որն ընդունվել էր խորհրդի կողմից, և սա այն ցուցակն էր, որը կուսակցության կանոնանդրության համաձայն ընդունվել էր խորհրդի կողմից։

–Ի՞նչ տրամաբանությամբ էր կազմվել այդ ցուցակը։

–Տրամաբանությունն այն էր, որ հնարավորինս ավելի լայն դաշտ ապահովվեր «Ժառանգության» միջոցով, և «Ժառանգությունն» այն կուսակցությունն է եղել, որ միշտ իր առաջնային, նեղ կուսակցական հարցերը մի կողմ է դրել և ավելի լայն կոնսոլիդացիայի կողմնակից է եղել։

–Մանդատից հրաժարվելու Րաֆֆի Հովհաննիսյանի առաջարկն ինչպե՞ս եք գնահատում։

–Նոր վարչությունը այդ հարցը կքննարկի և կվերլուծի։

–Իսկ Ձեր անձնական տեսանկյունի՞ց։

–Կքննարկենք։ Դա, իհարկե, քննարկելու խնդիր է այն պատճառով, որ տարբեր տեսակետներ կան՝ և՛ կողմ, և՛ դեմ։ Դա փաստարկված պետք է լինի, ուստի և մենք պետք է փաստարկված քննարկում իրականացնենք։

–Փաստորեն, եթե վարչությունը հաստատի Րաֆֆի Հովհաննիսյանի առաջարկը, մեխանիկորեն ստացվում է, որ «Ժառանգություն» խմբակցության պատգամավոր է դառնում ցուցակի հաջորդ համարը՝ Թևան Պողոսյանը։

–Մեխանիկորեն այդպես է։ Բայց ինչպիսի վերադասավորումներ կլինեն ցուցակում, կարծում եմ՝ մոտ ապագայում մենք կտեսնենք։

–Այսինքն հնարավոր է՝ վարչությունը որոշի, որ Թևան Պողոսյանը պետք է ինքնաբացարկ հայտնի, և ուրի՞շ մեկը դառնա պատգամավոր։

–Վարչությունը չի որոշում որևէ մեկի ինքնաբացարկ հայտնելը, այլ տվյալ թեկնածուն է որոշում, ուստի կարծում եմ՝ ժամանակը ցույց կտա, թե ով կլինի հաջորդ պատգամավորը։

–Ինչո՞վ էր պայմանավորված, որ «Ազատ դեմոկրատների» առաջատար դեմքերը «Ժառանգության» համագումարին չկային։

–Կարծում եմ՝ իրենց այդ հարցը պետք է ուղղվի և ոչ թե ինձ, որովհետև իրենք է, որ չկան։ Կարծում եմ՝ հարգելի պատճառ իրենք կունենան։

–Գուցե այդպիսով ինչ–որ բա՞ն են ուզեցել հասկացնել։

–Չեմ կարծում, հասկացնելու որևէ խնդիր չկա։

–«Ժառանգությունը» հունիսի 2–ին դեռ նոր որոշեց՝ ով պետք է գնա խորհրդարան, ով՝ ոչ, բայց մինչև այդ «Ազատ դեմոկրատները» գնացել և վերցրել են իրենց մանդատները։

–«Ազատ դեմոկրատները»՝ որպես ՀՀ քաղաքացիներ, իրավունք ունեն սեփական որոշումները կայացնել, այնպես որ՝ ես չէ, որ իրենց քայլերը պետք է գնահատեմ։

–Դուք միասնական ցուցակ եք ներկայացրել, միասին որոշել եք, որ իրար հետ եք ճանապարհ գնալու, բայց իրենք առանց ձեր կարծիքը հաշվի առնելու գնում են և վերցնում։

–Բայց նրանք նաև ինքնուրույն քաղաքական ուժ են, ուստի և կարծում եմ՝ դա իմ մեկնաբանելու խնդիրը չէ։

Հարցազրույցը վարեց Արեգնազ Մանուկյանը