Վաղը Ծաղկաձորի «Մուլտի Հաուս»  հյուրանոցում իր աշխատանքն է սկսելու «Հայ-ռուսական հասարակական կազմակերպությունների միության» նախաձեռնած միջազգային համաժողովի լիագումար նիստը: Ապրիլի 26-ից մեր երկրում են մեծ թվով հասարակական կազմակերպությունների ղեկավարներ` ԱՊՀ անդամ և Բալթյան երկրներից:

 Հավաստի տեղեկությունների  համաձայն, համաժողովին ուղերձ է հղելու ՌԴ ընտրված նախագահ, վարչապետ Վլադիմիր Պուտինը: Տեղեկացնենք, որ «Հայ-ռուսական հասարակական կազմակերպությունների միության» նախագահը «Բարգավաճ Հայաստան» կուսակցության առաջնորդ Գագիկ Ծառուկյանն է:

Ի դեպ, «Հասարակական կազմակերպությունների դերը Եվրասիական միության կազմավորման խնդրում» միջազգային համաժողովը կայանում է  Գ. Ծառուկյանի աջակցությամբ:

Փորձագետների գնահատմամբ՝ խորհրդարանական ընտրություններից մի քանի օր առաջ նման միջոցառման անցկացումը չի կարող պատահականություն համարվել: Առավել ևս, պատահականություն չի կարող համարվել Վլ. Պուտինի ուղերձը` ուղղված Ծառուկյանի կողմից կազմակերպված և նրա աջակցությամբ տեղի ունենալիք միջոցառմանը: