«Եվրանեստի» ԽՎ սոցիալական հարցերով, կրթության, մշակույթի, քաղաքացիական հասարակության հանձնաժողովի նիստի ժամանակ ՀՀ ԱԺ պատգամավոր Արամ Սաֆարյանը հարց է ուղղել նիստին ներկա Ադրբեջանի կրթության նախարար Միսիր Մարդանովին.

–Ճի՞շտ է, որ ձեր դպրոցական դասագրքերում քարոզվում է ատելություն, անհանդուրժողականություն հայերի նկատմամբ։

Մարդանովը պատասխանել է հետևյալը.

–Նման խնդիրը պետք է լուծեն մասնագետները, ովքեր կհավաքվեն և համապատասխան հետաքննություն կանցկացնեն։ Ես չեմ կարող ասել, և դա սուտ կլիներ, որ մեզ մոտ բարիդրացիական տրամադրություններ են Հայաստանի և հայերի նկատմամբ։ Մեր հասարակությունների միջև խոր անդունդ է։ Այսօրվա միջոցառումն այդ անդունդը հաղթահարելու ևս մեկ քայլ է։ Ես չգիտեմ՝ ինչ են գրում ձեր դասագրքերում, և դուք չգիտեք՝ ինչ են գրում մեր դասագրքերում, այդ պատճառով դժվար է պատասխանել ձեր հարցին։ Նման խնդիրները պահանջում են լուրջ հետազոտություններ մասնագետների կողմից։