Գյումրու Թատերական հրապարակում արդեն մի քանի օր է, ինչ «Քվեն ուժ է» նախաձեռնության ակտիվիստները վրան են տեղադրել և ստորագրահավաք կազմակերպել, որտեղ քաղաքացիները պատրաստակամություն են հայտնում պայաքարելու ընտրակեղծիքների դեմ: Վրանի վրա փակցված են «Քվեն ուժ է», «Մի՛ վաճառեք ձեր երեխաների ապագան» և նմանատիպ այլ կարգախոսներ:

Սակայն այսօր արդեն վրանն անհետացել էր Թատերական հրապարակից: Ոստիկանները երեկ ուշ երեկոյան նախաձեռնության հեղինակներին կանչել են բաժանմունք և հրահանգել հանել վրանը: Ըստ ակտիվիստների՝ ոստիկանության պաշտոնական պատճառաբանությունն այն է եղել, որ ակցիան արտոնված չէ Գյումրու քաղաքապետարանի կողմից: Երիտասարդները համաձայնվել են հանել վրանը, սակայն այսօր կեսօրին դարձյալ հայտնվել են ոստիկանները և պահանջել հանել սեղանը, որին մոտենում և ստորագրում են քաղաքացիները, ինչպես նաև պահանջել են թռուցիկներ չբաժանել: Հավանաբար ոստիկաններին դուր չի եկել, որ քաղաքացիները պատրաստակամություն են հայտնում ընտրակեղծիքների դեմ պայքարել:

Ըստ «Քվեն ուժ է» նախաձեռնության ակիվիստների՝ իրենց նմանօրինակ ակցիայի համար առիթ է հանդիսացել այն հանգամանքը, որ դեռևս պաշտոնական քարոզչությունը չսկսված՝ Գյումրիում անհանգստացնող չափերի է հասնոմ տարբեր նվերների տեսքով ընտրակաշառքների բաժանումը, և երիտասարդները կոչ են արել գյումրեցիներին չտրվել գայթակղություններին ու աճուրդի չհանել սեփական քվեն:

–Հիմա ասում են՝ սեղանիկը հանեք, իբր օրենքը թույլ չի տալիս, բայց թույլտվություն պետք էլ չէ սեղանիկի և բուկլետների համար: Մենք, իհարկե, չենք պատրաստվում սեղանը հանել,–ասել է «Քվեն ուժ է» նախաձեռնության ակտիվիստ Արման Մարտիրոսյանը:

Այնտեղ գտնվող փաստաբան Թամարա Յայլոյանն էլ իր հերթին նշել է, որ ոստիկանության պահանջը հակաօրինական է.

–Չեմ կարծում, որ մի երկու–երեք հոգի կանգնածներով կարելի է մասսայական հավաք դիտարկել, որտեղ բրոշյուրներ են բաժանում: Բրոշյուրներ են բաժանում նաև «Ֆաբերլիկ» ֆիրման, Եհովայի վկաներն ու այլք, և որևիցե մեկը նրանց չի արգելում: Նույն կերպ այստեղ է, և կարծում եմ, որ պետք է թույլատրել,- ասել է Թամարա Յայլոյանը:

Այսօր կեսօրից հետո երիտասարդների ջանքերով կրկին վրանը տեղադրվել է Թատերական հրապարակում:

Դերենիկ Մալխասյան

Գյումրի