Ինչպես ամեն հինգշաբթի՝ այսօր էլ կառավարության շենքի դիմաց բողոքի գործողություն են իրականացնում տարբեր խնդիրների շուրջ համախմբված քաղաքացիներ։ Այսօր նրանց միացել են Մաշտոցի պուրակի նստացույցի մասնակիցների մի մասը՝  «Յուրաքանչյուր ոք ազատ է կատարելու այն, ինչն արգելված չէ օրենքով, և չի խախտում այլոց իրավունքները և ազատությունները», «Ոստիկանները բիրտ ուժ են կիրառել այս գիշեր», «Պատժել ոստիկանապետին, քաղաքապետին, որոշում կայացնողներին»,  «Հանրային տարածքը հանրությանն է» գրություններով։ 

Հիշեցնենք, որ այսօր կառավարության նիստի օրակարգում ընդգրկված է որոշման նախագիծ, ըստ որի Մաշտոցի պուրակում տեղադրված կրպակները պետք է ապամոնտաժվեն երեք տարվա ընթացքում։ Ակտիվիստները երեկ հայտարարություն էին տարածել, որով վարչապետից պահանջում էին օրակարգից հանել այդ նախագիծը՝ փոխարենն ընդունել կրպակները անհապաղ ապամոնտաժելու վերաբերյալ որոշում ՝ տալով հստակ հանձնարարականներ: