Ֆուտբոլի միջազգային ֆեդերացիան (ՖԻՖԱ) 250 հազար դոլար կփոխանցի եդիպտական Պորտ–Սաիդում ֆուտբոլային խաղի ավարտից հետո սկսված անկարգությունների հետևանքով զոհվածների ընտանիքներին։ Այս մասին հայտնում է ֆեդերացիայի մամլո ծառայությունը։

Հիշեցնենք, որ անցած չորեքշաբթի Պորտ–Սաիդի «Ալ–Մասրի» և Կահիրեի «Ալ–Ահրի» թիմերի խաղից հետո մեծ անկարգություն է բռնկվել ամբողջ մարզադաշտում։ Հազարավոր երկրպագուներ՝ զինված դանակներով և այլ իրերով, վերջնական սուլիչից հետո ներխուժել են դաշտ և բախվել միմյանց։ Այդ ծեծկռտուքի հետևանքով զոհվել է 74 մարդ, իսկ ավելի քան 300–ը վիրավորվել են։

«Ողբերգությունից հետո ես ասացի, որ ֆուտբոլի պատմության մեջ այդ օրը սև դարձավ։ Ես մինչ այժմ ցնցված եմ կատարվածով։ Զոհերի մեծ մասը երիտասարդներ էին և իրենց ընտանիքների հիմքերն էին։ Ֆուտբոլային ամբողջ հանրությունը, այդ թվում և ՖԻՖԱ–ն, պետք է օգնության ձեռք մեկնեն իրենց եգիպտացի եղբայրներին և քույրերին»,–հայտարարել է Յոզեֆ Բլատերը։