Կահիրեում դատարանը Եգիպտոսի ներքին գործերի նախկին նախարարին դատապարտել է 12 տարվա ազատազրկման։ ՆԳՆ նախկին ղեկավար Հաբիբ ալ–Ադլիին մեղավոր են ճանաչել փողերի լվացման և բյուջետային միջոցները ծախսելու համար։

Նախկին նախարարը հրաժարվել է ընդունել իր մեղքը։

Հղում անելով «Բի–Բի–Սի»–ին՝ «Ուկրինֆորմ»–ը փոխանցում է, որ Հաբիբ ալ–Ադլին մեղադրվում է նաև այլ գործով՝ կապված հունվարին Կահիրեում ցուցարարների սպանությունների հետ, որոնք դեմ էին երկրի նախկին նախագահ Հոսնի Մուբարաքի կառավարմանը։

Շատ եգիպտացիներ ուշադրությամբ հետևել են Հաբիբ ալ–Ադլիի դատական գործընթացին, ով համարվում է Եգիպտոսում ժողովրդական զանգվածային բողոքների ժամանակ ցուցարարների նկատմամբ դաժան վերաբերմունքի գլխավոր մեղավորներից մեկը։