Քաղաքական

21.02.2020 18:02


«Դուխով» գրությամբ նստարանները պաշտպանվում են պետական գաղտնիքով

«Դուխով» գրությամբ նստարանները պաշտպանվում են պետական գաղտնիքով

2019 թվականի նոյեմբերի 2-ին ՀՀ վարչապետ Նիկոլ Փաշինյանը «Հանրապետության թիվ 1 առանձնատան մասին» խորագրով ֆեյսբուքյան ուղիղ եթեր էր հեռարձակել կառավարական այն առանձնատնից, որտեղ ներկայումս բնակվում է ընտանիքի անդամների հետ: Ուղիղ եթերի ընթացքում` մինչ Փաշինյանը խոսում էր ընդամենը վերջերս միլիոնավոր դոլարներով վերանորոգված առանձնատան մասին՝ այդպես էլ կոնկրետ գումար չնշելով, առանձնատան հարակից տարածքում երևում էին «Դուխով» գրությամբ մի քանի նստարաններ:

Պարզելու համար, թե երբ և քանի «Դուխով» գրությամբ նստարաններ են տեղադրվել նշված կառավարական առանձնատան հարակից տարածքում, ումից և ինչ արժեքով են ձեռք բերվել այդ նստարանները, և արդյոք նշված գրությամբ նստարանները տեղադրվե՞լ են կառավարական այլ առանձնատների հարակից տարածքներում, թե՞ ոչ, AntiFake.am-ը հարցում էր ուղարկել Վարչապետի աշխատակազմին՝ խնդրելով նաև տրամադրել նշված նստարանների ձեռքբերման պայմանագրերը:

Հարցմանը պատասխանել է Վարչապետի աշխատակազմի «Կոնդի առանձնատների տնտեսություն» ՊՈԱԿ-ը։ Ստացված հարցման պատասխանում, սակայն, ՊՈԱԿ-ը հղում է կատարել «Գնումների մասին» ՀՀ օրենքի 15-րդ հոդվածի 2-րդ մասին՝ նշելով, որ հատուկ պետական պաշտպանության ենթակա անձանց կեցության ապահովման համար անհրաժեշտ ապրանքների, աշխատանքների և ծառայությունների վերաբերյալ տեղեկատվություը պարունակում է պետական գաղտնիք, որով պայմանավորված՝ տեղեկատվության տրամադրումը մերժվել է:

Այսինքն՝ ստացվում է, որ «Դուխով» գրությամբ նստարանների համար հատկացված գումարները, նստարանների քանակը, դրանց տեղադրման վայրերը և այլ մանրամասները պարունակում են պետական գաղտնիք, ուստի դրանց վերաբերյալ տեղեկատվությունը հրապարակման ենթակա չէ:

Նկատենք, որ նախկինում ըննդիմադիր Նիկոլ Փաշինյանը որպես Երևանի քաղաքապետի թեկնածու քննադատում էր Երևանի նախկին քաղաքապետ Տարոն Մարգարյանին՝ ասելով, որ վերջինս 65 հազար դրամանոց Երևան գրությամբ նստարանը գնում է 160 հազար դրամով:

«Երևան քաղաքի նստարանները, որ փողոցներում դրված են, մեկ հատը գնվում է 160 հազար դրամով: Մեր փորձագետները գտնում են, որ դա փոխված գին է, կոռուպցիոն ռիսկեր կան… 30-50 տոկոսով ուռճացված է գինը և հաստատ 160 հազար դրամ չի՝ դա այդպես է»,-տարիներ առաջ ասել է «Ելք» դաշինքի քաղաքապետի թեկնածու Նիկոլ Փաշինյանը:

Փաշինյանը նաև ուշադրություն է հրավիրել այն փաստի վրա, որ այդ նստարանները ձեռք են բերվում մի ընկերությունից, որը, Փաշինյանի տպավորությամբ, ստեղծված էր հատուկ Երևանի քաղաքապետարանին մատակարարումներ անելու համար, քանի որ այն արտադրում էր միայն այն, ինչ գնվում էր Երևանի քաղաքապետարանի կողմից՝ նստարաններ, կանգառասրահներ, ուղեցույցներ, հասցեի ցուցանակներ…:

Նկատենք, որ նույն` «Երևան» գրությամբ նստարանները Նիկոլ Փաշինյանի կուսակից ընկեր, Երևանի քաղաքապետ Հայկ Մարությանը ներկայումս նույն ընկերությունից գնում է 164 հազար դրամով։ Այս մասին հայտարարել է Երևանի փոխքաղաքապետ Հայկ Սարգսյանը՝ նշելով. «164 հազար դրամը նստարանի համար չեմ կարծում, որ գերթանկարժեք է, գուցե եւ թանկ է»։

Ստացվում է, որ նախկինում Փաշինյանի քննադատության թիրախում հայտնված և ըստ Փաշինյանի` կոռուպցիոն ռիսկերով՝ 30-50 տոկոսով ուռճացված գնով գնված նստարանները ներկայումս առավել թանկ գնով են գնվում Երևանի քաղաքապետարանի կողմից: Բացառված չէ, որ 30-50 տոկոսով «ուռճացված կամ առավել թանկ, բայց ոչ գերթանկարժեք» գնով և կոռուպցիոն ռիսկերով էլ գնվել են «պետական գաղտնիք» պարունակող «Դուխով» գրությամբ նստարանները, եթե, իհարկե, ոչ ավելի թանկ, քանի որ Փաշինյանի կառավարական առանձնատանը տեղադրված նստարաններն ունեն «յուրօրինակ» գրառում, որի պատրաստման համար, գուցե, տնտեսվարողը լրացուցիչ գումար է մատնանշել։ Բացառված չէ նաև այն, որ «Դուխով» գրությամբ նստարանները գնված լինեն նույն ընկերությունից, որը ստեղծված է հատուկ Երևանի քաղաքապետարանի և կառավարական առանձնատան/տների համար անհրաժեշտ իրեր արտադրելու և մատակարարելու համար, քանի որ արտաքին տեսքով դրանք նույնական են «Երևան» գրությամբ նստարանների հետ։ Այս ամենը հերքելու կամ հաստատելու, ամբողջական տեղեկատվություն տրամադրելու փոխարեն Վարչապետի աշխատակազմը նախընտրել է «Դուխով» գրությամբ նստարանների ձեռքբերումը համարել պետական գաղտնիք՝ չտրամադրելով որևէ տեղեկատվություն:

Սա ընդամենը մեկն է այն բազմաթիվ դեպքերից, երբ Կառավարության և հատկապես Նիկոլ Փաշինյանի համար արված թանկարժեք գնումները գաղտնի են պահվում՝ հակասելով Կառավարության որդեգրած բաց, թափանցիկ և հանրությանը հաշվետու քաղաքականությանը:

Աղբյուրը՝ AntiFake.am

Այս խորագրի վերջին նյութերը