«7օր»-ի հետ զրույցում, մեկնաբանելով Սփյուռքի գաղթօջախներ ՀՀ նախագահին ուղեկցելու ՍԴ նախագահ Գագիկ Հարությունյանի քայլը, իրավագետ  Հրայր Թովմասյանը նշել է, թե այդտեղ որևէ հակաօրինական բան չի տեսնում։  Ըստ նրա, հանրապետության նախագահի այցի ընթացքում քննարկվել են ոչ միայն հայ-թուրքական արձանագրությունների, այլ նաև համահայկական հնչեղություն, նշանակություն ունեցող տասնյակ այլ հարցեր.

-Սահմանադրական դատարանի նախագահն այդ ժամանակահատվածում նաև Համահայկական հիմնադրամի  համանախագահներից  մեկն էր, և աշխատանքներին իր մասնակցությունը եղել է պարզապես այդ շրջանակներում։ Սահմանադրական դատարանի  մասին օրենքն արգելում է ՍԴ անդամին, իսկ նախագահը նաև դատարանի անդամ է, հրապարակայնորեն կարծիք արտահայտել այն ակտի վերաբերյալ, որը կարող է դառնալ իրենց քննարկման առարկա։ Ինքը հրապարակայնորեն չի ասել՝ լավ է, վատ է, Սահմանադրությանը համապատասխանում է, չի համապատասխանում։ Այսինքն, պասիվ, ֆիզիկապես ներկա գտնվելը մի քննարկման, որտեղ արծարծվել է նաև այդ հարցը, չի կարող կամ չպետք է մեկնաբանվի որպես իր դիրքորոշում, իր կարծիքը այդ հարցի վերաբերյալ։ Ուստի ՍԴ նախագահի վարքագծում որևէ ռիսկ, որ հետագայում կարող է անդրադառնալ, ես չեմ տեսնում։

«7or.am»