«Դուպլեքս» ակումբում ՀՀ տնտեսական վիճակի մասին խոսելիս ԲՀԿ խմբակցության անդամ Վարդան Բոստանջյանն ասել է, թե իրավիճակն այնքան էլ ուրախ չի, բայց ամեն դեպքում ՀՀ-ում տնտեսական զարգացման առումով քաղաքականություն վարվում է, և բացառված չէ, որ հետագայում մեր զարգացումն ավելի բարձր լինի։

Անդրադառնալով վարվող դրամավարկային քաղաքականությանը՝ Վ. Բոստանջյանն ասել է, թե հակված չէ բարձր գնահատել այն.

-Իհարկե՝ գիտեմ, որ դրամավարկային քաղաքականությունը բարդ ինստիտուտ է, և ՀՀ պարագայում, այո՛, պայմանավորված է բազմաթիվ օբյեկտիվ ու սուբյեկտիվ հանգամանքներով։ Կարող են մեծ շեղումներ լինել, հատկապես այն պարագայում, երբ ֆինանսական շուկան մեր հանրապետությունում 92%-ով կառավարվում է մեկ կետից՝ ԿԲ-ի կողմից, որն ունի բազմաթիվ բաղադրիչներ։ Սա իր հերթին ստեղծում է որոշակի բացասական մոտեցումներ ընդհանրապես ֆինանսական համակարգի, դրա առողջացման և կայունության համար։

Ինչ վերաբերում է փոխարժեքի դրսևորումների վերաբերյալ կանխատեսումներին, բանախոսն ասել է, որ չի կարող կանխատեսումներ անել.

-Կարող են կանխատեսել բացառապես նրանք, ովքեր արդեն գիտեն այդ սցենարների մասին։ Այդ սցենարները, իմ կարծիքով, որոշակի առումով կրում են անոմալ բնույթ և պայմանավորված են բազմաթիվ հանգամանքներով։

Այս տեսանկյունից նա նշել է, որ ՀՀ-ում ֆինանսական հոսքերի կառավարման առումով գոյություն ունի մի վիճակ, որի պարագայում դրամը կարող է ավելի ուժեղանալ, կարող է թուլանալ, ինչը, իր ուսումնասիրության արդյունքներով, ինչ-որ տեղ նաև սուբյեկտիվ բնույթ է կրում։

7or.am