2014 թվականի ապրիլի 24-ին Արմավիր քաղաքում քաղաքացի Սամվել Հ.-ն կենցաղային հարցի շուրջ վիճաբանել է համաքաղաքացի Օհան Հ.-ի և վերջինիս ընկերների հետ: Սամվել Հ.-ն խուլիգանություն կատարելու դիտավորությամբ, կոպիտ կերպով խախտելով հասարակական կարգը, հավաքված քաղաքացիների ներկայությամբ Օհան Հ.-ի հասցեին հայհոյանքներ է հնչեցրել: Այնուհետև Սամվել Հ.-ն, բացահայտ անհարգալից վերաբերմունք դրսևորելով հասարակության նկատմամբ, իր մոտ ապօրինի պահվող ատրճանակից կրակոց է արձակել:

Փաստի առթիվ ՀՀ ոստիկանության նախկին քննչական գլխավոր վարչության Արմավիրի քննչական բաժնում հարուցվել է քրեական գործ: Տևական ժամանակ կատարված նախաքննության ընթացքում Սամվել Հ.-ին մեղադրանք է առաջադրվել ՀՀ քրեական օրենսգրքի 258-րդ հոդվածի 4-րդ մասով, նրա նկատմամբ հայտարարվել է հետախուզում, իսկ քրեական գործով վարույթը կասեցվել է:

Հետագայում գործի փաստական հանգամանքներով պայմանավորված՝ լրիվ, օբյեկտիվ ևբազմակողմանի քննությունը երաշխավորելու անհրաժեշտությունից ելնելով՝ ՀՀ գլխավորդատախազի կողմից քրեական գործը քննության է ուղարկվել ՀՀ հատուկ քննչականծառայություն:

ՀՀ հատուկ քննչական ծառայություն ուղարկված հիշյալ քրեական գործով վարույթը վերսկսվել է, քանի որ տևական ժամանակ հետախուզման մեջ գտնվող, գործով մեղադրյալ Սամվել Հ.-ն ներկայացել է:

Նախաքննությունը շարունակվում է:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

ՀՀ հատուկ քննչական ծառայության

լրատվական ծառայություն