Այսօր՝ դեկտեմբերի 4-ին, կյանքից հեռացավ հաշվողական տեխնիկայի և կառավարման համակարգերի բնագավառում ականավոր գիտնական, տեխնիկական գիտությունների դոկտոր, պրոֆեսոր, ՀՀ Գիտությունների ազգային ակադեմիայի ակադեմիկոս, Հայաստանի հանրային խորհրդի անդամ, ՀՍՍՀ պետական և Լենինյան մրցանակների դափնեկիր, ՀՀ գիտության վաստակավոր գործիչ Ռոբերտ Աթոյանը:
Օրերս գիտական հանրությունը նշեց ակադեմիկոս Ռոբերտ Աթոյանի 80-ամյա հոբելյանը և բարձր գնահատեց հաշվողական տեխնիկայի միջոցների ստեղծման և կադրերի ձևավորման գործում նրա ունեցած մեծ ավանդը:
Ռոբերտ Աթոյանն իր գիտական գործունեությունը ծավալել է Երեւանի մաթմատիկական մեքենաների գիտահետազոտական ինստիտուտում, որտեղ աշխատել է 1958 թվականից: Իր կյանքի վերջին տարիներին Աթոյանը զբաղեցրել է Երեւանի մաթմատիկական մեքենաների գիտահետազոտական ինստիտուտի գլխավոր կոնստրուկտորի պաշտոնը:
Հաշվողական տեխնիկայի բնագավառում մեծ ներդրման համար Ռոբերտ Աթոյանին շնորհվել է ՀՀ գիտության վաստակավոր գործչի կոչում: Նա պարգևատրվել է ԽՍՀՄ Լենինյան մրցանակով, տեխնիկայի ու գիտության բնագավառում ՀՍՍՀ պետական մրցանակով, Աշխատանքի կարմիր դրոշի շքանշանով, ՀԽՍՀ Գերագույն խորհրդի պատվոգրով:
Ռոբերտ Աթոյանն ավելի քան 100 գիտական աշխատանքների և 2 մենագրությունների հեղինակ է: Նրա ղեկավարած կոլեկտիվում պաշտպանվել են ավելին քան 30 թեկնածուական և 5 դոկտորական ատենախոսություններ:
Ակադեմիկոս Աթոյանը երկար տարիներ եղել է ՀՀ Գիտությունների ազգային ակադեմիայի նախագահության անդամ, վարել է ակտիվ գիտական գործունեություն, մեծ հեղինակություն է ունեցել գիտական հանրության շրջանում:
ՀՀ Գիտությունների ազգային ակադեմիայի նախագահությունը և գիտական հանրությունը սգում է Ռոբերտ Աթոյանի կորուստը և իր ցավակցությությունն է հայտնում Ռոբերտ Աթոյանի ընտանիքին և մտերիմներին:
Ռոբերտ Աթոյանի հոգեհանգիստը տեղի կունենա Երևանի մաթեմատիկական մեքենաների գիտահետազոտական ինստիտուտում՝ դեկտեմբերի 6-ին, ժամը՝ 17:00-ին (հասցե` Հ. Հակոբյան 3): Հուղարկավորությունը տեղի կունենա դեկտեմբերի 7-ին` ժամը՝ 13:00-ին՝ ՀՀ ԳԱԱ նախագահությունից (հասցե` Մարշալ Բաղրամյան պողոտա 24):

ՀՀ ԳԱԱ