-Կարծում եմ՝ Սահմանադրական դատարանում որոշակի խնդիրներ պետք է լինեն։ Բացի դրանից, մեր կարծիքով, Սահմանադրական դատարան պետք է ներկայացնել իրավական տեսանկյունից վերլուծված և փորձաքննություն անցկացրած համապատասխան փաստաթուղթ։ Մենք Սահմանադրական դատարանին պետք է կամ ինքներս առաջարկենք այդպիսի փորձաքննության արդյունքները, կամ ինքը՝ ՍԴ-ն պետք է այդպիսի դերակատարություն վերցնի իր վրա, որովհետև այդ փաստաթղթերում բավական շատ է անգրագետ դիվանագիտական տերմինների օգտագործումը, և շատ հասկացություններ երկիմաստ են,- անդրադառնալով Հայաստանի և Թուրքիայի միջև ստորագրված արձանագրությունների՝ ՀՀ Սահմանադրական դատարանում գտնվելուն՝ «7օր»-ին ասել է Հայաստանի դեմոկրատական կուսակցության նախագահ Արամ Սարգսյանը։ Նրա կարծիքով վերոնշյալ հանգամանքը հիմք է ծառայելու, որ ՍԴ-ն շատ ավելի լրջորեն մոտենա այդ փաստաթղթերի բովանդակությանը։ Այս առումով նա նշել է, որ գոյություն ունի ևս մեկ հարց, այն է՝ որքանո՞վ են այդ արձանագրությունները համապատասխանում ՀՀ Սահմանադրության պահանջներին։

Ինչ վերաբերում է արձանագրությունների դեմ պայքարին, Արամ Սարգսյանը նշել է, որ նոյեմբերի 20-ին տեղի է ունեցել հանդիպում ՀՅԴ նախաձեռնությամբ  հայ-թուրքական նախաստորագրված արձանագրությունների դեմ համատեղ հայտարարության տակ ստորագրած մի շարք կուսակցությունների ղեկավարների հետ, որտեղ քննարկվել են հետագա գործողությունները։

-Իհարկե կան խնդիրներ և քայլեր, որոնք անհրաժեշտ է կատարել, և մենք պատրաստ ենք դրանք կատարել։ Մենք պայմանավորվել ենք, որ կուսակցությունների ղեկավար մարմինները պետք է քննարկեն այդ բոլոր հարցերը և հայտարարեն միասնական գործողությունների մասին,- ընդգծել է Արամ Սարգսյանը։

7or.am