«Ես ասեմ, որ որևէ դեսպան, որևէ օտար միջավայր երբեք իրավունք չունի մեր պետության նկատմամբ մատ թափ տալ: Ես նայել եմ ԱՄՆ դեսպանի զեկույցը: Խնդիրը միգուցե ձևակերպումներն են: Նա սկզբունքորեն ամերիկյան քաղաքականությունն է ներկայացնում: Իրենք ցանկանում են հիմքեր ստեղծել և օգնել, որպեսզի կոռուպցիայի դեմ պայքարն ավելի հզորանա, որը մեզ համար ձեռնտու է»:

Այս մասին Ազգային ժողովում լրագրողների հետ զրույցում ասաց ԱԺ նախագահ Գալուստ Սահակյանը` պատասխանելով «Newsbook.am»-ի հարցին, թե ՀՀ-ում կոռուպցիայի տեմպերի նվազման գործում սպասվո՞ւմ է առաջընթաց, քանի որ ըստ ԱՄՆ դեսպանի հայտարարության` այդ առաջընթացը չգրանցելու դեպքում իրենք կդադարեն ֆինանսավորել Հայաստանին:

Խորհրդարանի ղեկավարն ընդգծեց, որ իրենց հաճելի չէ, որ ԱՄՆ դեսպանը ցանկանում է տարբերվել մյուս դեսպաններից և իմպերատիվ խոսք ասել. «Օտարներին պետք է հասկանալի դառնա, որ ճնշումների մեխանիզմով հնարավոր չէ խոսել մի ժողովրդի հետ, որը կարողացել է իր ուժերով վերականգնել իր անկախությունը: Մենք բավականին ծանր ժամանակաշրջան ենք ապրել և երբեք չենք երկնչել: Դեսպանը, փաստորեն, իր ոգևորության շրջանակով փորձում է իրադարության որոշակի պայմաններ ստեղծել և ինչ-որ ձևով համարումներ ունենալ: Մենք չենք ընդունում, որ մատ է թափ տալիս, որ մենք ձեզ փող չենք տա, մենք փողի երկիր չենք, մենք ավելի շատ փորձում ենք ազգային խնդիրները լուծել: Պետք է նման տիպի հայտարարությունները կոռեկտ լինեն»,- ասաց Սահակյանը:

Վերջինիս հավաստմամբ` իշխանությունների համար ընդունելի չէ այն ձևակերպումը, թե Հայաստանում կոռուպցիան սպառնում է ազգային անվտանգությանը: Ըստ Սահակյանի` չկա մի երկիր, որտեղ կոռուպցիոն ռիսկեր չլինեն, պարզապես Հայաստանի նման փոքր երկրում այն ավելի ակնառու է, քանի որ առաջին հերթին վնասում է հասարակ ժողովրդին. «Ամենամեծ կոռուպցիան դա մեծ երկրներում է, և քանի որ նրանք տնտեսապես զարգացած, հզոր երկրներ են` կոռուպցիան իշխանական մակարդակում է, մեր երկրում կոռուպցիան հարվածում է սովորական քաղաքացուն: Բոլորս էլ պայքարում ենք կոռուպցիայի դեմ, բայց դա այն հրեշը չէ, որ աչքով տեսնես ու միանգամից ոչնչացնես, համակարգը պետք է կարողանաս ավելի ուժեղանալ»,- շեշտեց ԱԺ նախագահը և շարունակելով խոսքը` ասաց, թե բացի համակարգի փոփոխությունից՝ ժողովրդի մոտ պետք է որոշակի տրամադրություններ արթնանան, որպեսզի մաս չկազմեն կոռուպցիոն գործողություններին: Խորհրդարանի ղեկավարն ասաց, թե ժողովուրդն իր անճարությունից կամ ճարությունից է մասնակից դառնում կոռուպցիոն երևույթներին:

Մանրամասները՝ «Newsbook.am»–ում։