«ՀՀ ֆինանսների նախարար Տիգրան Դավթյանը չի պատրաստվում անդամագրվել Հայաստանի հանրապետական կուսակցությանը»։ Ի պատասխան «7օր»-ի հարցադրմանը, թե ֆինանսների նախարարը չի՞ պատրաստվում հետևել վարչապետ Տիգրան Սարգսյանի օրինակին և անդամագրվել ՀՀԿ-ին՝ տեղեկացրել են Ֆինանսների նախարարությունից։

Ի դեպ, Ֆինանսների նախարարությունից այս պատասխանը ստանալու համար երկու օր պահանջվեց։ Հարցը լսելուն պես նախարարության լրատվության և հասարակայնության հետ կապերի վարչության ղեկավար Իրինա Այվազյանն ասաց, թե նախարարը չի անդամագրվել Հանրապետական կուսակցությանը։ «Վստա՞հ եք»,–հարցրինք։

-Պետք է ճշտել. կարող է այս ընթացքում ինչ-որ բան փոխված լինի,-ասել է մամլո խոսնակն ու խոստացել ավելի ուշ պատասխանել հարցին։

Եվ միայն մեկ օր անց Ֆինանսների նախարարության լրատվական ծառայությունից մեզ այսօր հաղորդեցին, որ ՀՀ ֆինանսների նախարար Տիգրան Դավթյանը չի պատրաստվում անդամագրվել Հայաստանի հանրապետական կուսակցությանը. «Այս պահին նման մտադրություն չկա»։

7or.am