ՀՀ վարչապետ Տիգրան Սարգսյանը 2010թ. պետական բյուջեի օրենքի նախագծի քննարկման ժամանակ իր ելույթում նշել էր, որ իրենց ուսումնասիրությունները ցույց են տվել, որ մեր քաղաքացիներին առաջին հերթին մտահոգում է ոչ թե թոշակների, աշխատավարձերի, գործազրկության, նոր աշխատատեղերի ստեղծման, գնաճի, փոխարժեքի խնդիրները ու նույնիսկ ոչ թե Լեռնային Ղարաբաղի կամ Ցեղասպանության ճանաչման խնդիրը, այլ սոցիալական արդարության խնդիրը։ Նա նշել էր նաև, որ բոլորը պետք է հավասար լինեն օրենքի առջև՝ անկախ նրանից, թե ինչ պաշտոնական դիրք են նրանք զբաղեցնում, ինչ կուտակած եկամուտներ կամ հարստություն ունեն։ Այդ  խնդիրը լինելու է ուշադրության կենտրոնում, հատկապես  խոշոր բիզնեսը։ «7օր»-ի հետ զրույցում մեկնաբանելով վարչապետի ելույթի այս հատվածը՝ «Ժառանգություն» կուսակցության մամլո խոսնակ Հովսեփ Խուրշուդյանն  ասել է, թե շատ վտանգավոր է համարում, երբ երկրի կառավարության ղեկավարը նախ նույն հարթության վրա է դնում, ապա հակադրում ազգային և սոցիալական խնդիրները։

-Լեռնային Ղարաբաղի և Ցեղասպանության խնդիրը հակադրում է սոցիալական արդարության խնդրին, ինչը շատ վտանգավոր է, և կարծում եմ, որ այնպիսի տպավորություն կարող է ստեղծվել, որ նյութական կամ սոցիալական ինչ-ինչ խնդիրներ մեղմելու ֆինանսական միջոցների հաշվին կարող են ինչ-որ զիջումնե՞ր արվել Ցեղասպանության կամ ԼՂ-ի հարցում, դրա՞ մասին է խոսքը...շատ տարօրինակ է,-նշել է նա։

Նա նշել է, որ իրենք դեմ են, որ խոշոր բիզնեսը «քամվի», և նրա հաշվին ինչ-ինչ խնդիրներ լուծվեն։

-Մենք ասում ենք՝ ոչ թե «քամեք» խոշոր բիզնեսը, այլ փոքր և միջին բիզնեսին ավելի մեծ հնարավորություն տվեք, չնայած մենք չենք հավատում նաև նրան, ինչ ասվում է խոշոր բիզնեսի մասով։ Միշտ ասվում է, որ խոշոր բիզնեսը բերելու են հարկային դաշտ, բայց մենք դեռ որևէ դեպք չտեսանք, որ խոշոր բիզնեսը բերվի հարկային դաշտ, ինչպես մանր և միջին բիզնեսը,-նշել է Հովսեփ Խուրշուդյանը։

Այն հարցին, թե արդյոք սա բիզնեսի վերաբաշխում չէ՞, նա պատասխանել է, որ դա էլ չի բացառում։

7or.am