Ա՛յ, որ սահմանադրական փոփոխությունները շուտ անեինք, բրիտանացի Ռոբերտ Ուոլթերը էդ տեսակ նամարդություն չէր անի, ոչ էլ Ադրբեջանի խավիարին, փողին ու թանկարժեք նվերներին թամահ կաներ:

Մի քիչ որ շտապեինք նոր Սահմանադրությունն ընդունելու հարցում, հաստատ ԵԽԽՎ-ական բրիտանացի պատգամավորը չէր նստի ու «Բռնությունների աճը Լեռնային Ղարաբաղում և Ադրբեջանի այլ գրավյալ տարածքներում» վերտառությամբ հակահայկական զեկույց գրի: Իսկ հիմա գրել եւ դրել է ԵԽԽՎ քաղաքական հարցերով հանձնաժողովի սեղանին, վերջինս էլ հավանություն է տվել զեկույցին ու ընդգրկել Վեհաժողովի 2016-ի ձմեռային նստաշրջանի օրակարգում:

Եթե նոր Սահմանադրությունն արդեն ընդունած լինեինք, ապա հայկական պատվիրակությունը չէր սեւեռվի միայն Ուոլթերի զեկույցի վերնագրի վրա (ամիսներ շարունակ սրանց ուզածը միայն այն էր, որ վերնագիրը փոխվի):

Ակնհայտ է, որ մեր պատվիրակությունը չէր էլ խորացել բովանդակության մեջ, որտեղ ԼՂ հարցի պրոադրբեջանական լուծում է առաջարկվում. կոչ է արվում Հայաստանին դուրս բերել հայկական զինուժը Լեռնային Ղարաբաղից և Ադրբեջանի մյուս «գրավյալ տարածքներից», հաստատել այդ տարածքներում Ադրբեջանի լիակատար ինքնիշխանություն, Մինսկի խմբին է կոչ արվում պլենար նիստ անցկացնել և Լեռնային Ղարաբաղին տալ միջանկյալ կարգավիճակ, որը կերաշխավորի ինչպես անվտանգությունը, այնպես էլ ներքին ինքնակառավարումը, ինչպես նաև՝ համաձայնեցված միջանցք բացել Հայաստանի և ԼՂ-ի միջև ու վստահության ամրապնդմանն ուղղված այլ քայլեր կատարել, այդ թվում՝ դեպի Նախիջևան մուտքի թույլտվություն եւ այլն:

Հայաստանը ժամանակ չուներ լրջորեն ծանոթանալու այդ զեկույցի բովանդակությանը, քանի որ զբաղված էր սահմանադրական փոփոխությունների գործընթացն ավարտին հասցնելու հույժ ազգանվեր գործով: Քանզի բոլորը վստահ էին, որ Սերժ Սարգսյանի արտաքին քաղաքական նախաձեռնողականությունն այնպիսի դրական զարգացումներ է արձանագրել, որ այսուհետ ոչ ոք չի հանդգնի հակահայկական զեկույցներ ու բանաձեւեր մշակել, հավանել ու հասցնել Ստրասբուրգի ամբիոն:

Դե, ոչինչ, ամեն ինչ դեռ կորած չէ: Շուտով հանրաքվեի ժամանակ «տոկոս կխփեն», հետո էլ կգնան Վեհաժողովի ձմեռային նստաշրջանում «տոկոս կխփեն»` կանխելով հակահայկական զեկույցի ընդունումը:

Բրիտանացի Ուոլթերն ուղղակի մանկամիտ քայլ է կատարել, շատ է վռազել` հաշվի չառնելով հանգամանքը, որ դեկտեմբերի 6-ից հետո Հայաստանն այլեւս հերոսաբար դիմագրավելու է թե՛ ներքին եւ թե՛ արտաքին բոլոր մարտահրավերներին: Չ՞եք հավատում։ Ով հավատում է՝ թող «այո» ասի սահմանադրական փոփոխություններին։

Կիմա Եղիազարյան