Կառավարության այսօրվա նիստում քննարկվել է ԱԺ ՀՀԿ–ական պատգամավորներ Հովհաննես Սահակյանի, Արտակ Դավթյանի, Գագիկ Մինասյանի և Գագիկ Մելիքյանի օրենսդրական նախաձեռնությունը։ Դրանով առաջարկվում է փոփոխություն կատարել Ընտրական օրենսգրքում և մի շարք այլ օրենքներում:

Կառավարության աշխատակազմի ղեկավար-նախարար Դավիթ Հարությունյանը նշել է, որ 2014թ. հունվարի 1-ից մարդուն անձնագիրը տրամադրվում է այն դեպքում, եթե նա ցանկանում է դուրս գալ երկրի սահմաններից, իսկ ՀՀ տարածքում անձը հաստատող փաստաթուղթ կիրառում է նույնականացման քարտը։ Դ. Հարությունյանը նաև ընդգծել է, որ Ընտրական օրենսգիրքը նախատեսում է ընտրություններին մասնակցել անձնագրերո՛վ, և որպես խնդրի լուծում՝ առաջարկվում է հնարավորություն ստեղծել՝ քվեարկելու նաև նույնականացման քարտերով։

Սակայն այստեղ մեկ խնդիր էլ կա՝ նույնականացման քարտը պլաստիկ է, իսկ դրա վրա քվեարկության ժամանակ դրոշմակնիք հնարավոր չէ դնել։ Թեև Դ. Հարությունյանը վստահ է, որ դա չի կարող ընտրակեղծիքների առիթ լինել։

Վարչապետ Հովիկ Աբրահամյանը հայտնել է, որ այսօր Հայաստանում մոտ 5000 քաղաքացի ունի նույնականացման քարտ։

–Ով անձնագրով կընտրի, կնիքը կդրվի, ով նույնականացման քարտով` չի դրվի,–ասել է նա:

7or.am