-Ես չէի ասի, թե միջազգային հանրությունը լրիվ նույն կեցվածքն ունի, ինչ Թուրքիան։ Թուրքիայի համար ղարաբաղյան հարցն ու հայ-թուրքական հարցերը նույնն են, և վարչապետն էլ դա հայտարարեց։ Միջազգային հանրությունն ասում է, թե այդ խնդիրներն իրար հետ կապ չունեն, բայց զուգահեռ են գնում։ Ես չեմ հասկանում՝ զուգահեռ ո՞նց կարող են գնալ, եթե կապ չունեն, որովհետև կարող է խաչվեն տարբեր ուղություններում,-լրագրողների հետ հանդիպման ժամանակ խոսելով հայ-թուրքական հարաբերությունների և ղարաբաղյան հակամարտության կարգավորման վերաբերյալ միջազգային կառույցների  դիրքորոշման մասին՝ ասել է ՀՅԴ Հայ դատի և քաղաքական հարցերի գրասենյակի պատասխանատու Կիրո Մանոյանը։

Նա նշել է, որ միջազգային հանրությունը Հայաստանին բավարարելու համար է ասում, թե այդ երկու հարցերը կապ չունեն, բայց բոլորն էլ ուզում են բավարարել Թուրքիային։

 -Կարծում եմ՝ առաջիկա ամիսներին Հայաստանի վրա ճնշումը կմեծանա Ղարաբաղի հարցով (դա, իհարկե, չի նշանակում, թե Հայաստանը տեղի կտա),  որպեսզի փորձեն Թուրքիային բավարարել, և որպեսզի Թուրքիան էլ արձանագրությունների վավերացման գործում քայլ անի,-նշել է Կիրո Մանոյանը։

7or.am