«Չե՛ք անցկացնի» քաղաքացիական նախաձեռնության հանրահավաքին Գյումրիում «Zham.am»-ի հետ զրույցում «Ազգային համաձայնություն» կուսակցության նախագահ Արամ Հարությունյանը խոսել է սահմանադրական փոփոխությունների նպատակից, «Ո՛չ»-ի շարժումից և առկա քաղաքական իրավիճակից:

–Պարո՛ն Հարությունյան, ինչպե՞ս կգնահատեք սահմանադրական փոփոխությունների գաղափարը, և ի՞նչ ակնկալիքներ կան «Ո՛չ»-ի շարժումից:

–Նախ՝ բոլորի համար ակնհայտ է, որ այս փոփոխություններն ընդամենը վերարտադրության համար են արվում: Ես տարբեր առիթներով ասել եմ, որ սա Սերժ Սարգսյանի, ինչպես Հիտլերը 1925 թվականին գրեց՝ «Մայն կամպֆն» է, և պայքարն է մեր ժողովրդի, մեր անկախության դեմ: Եւ մենք պետք է ամեն ինչ անենք, որ չիրականանա Սերժ Սարգսյանի երազանքը՝ մնալ իշխանության՝ չունենալով որևէ պատասխանատվություն:

–Եթե օբյեկտիվ գնահատական տրվի, որքանո՞վ է հնարավոր, որ «Ո՛չ»-ի ճակատը կհաղթի:

–Շատ կարևոր է, որպեսզի հստակ ասվի՝ «Ո՛չ», մյուս բաները հետո կասվեն, ու շատ կարևոր է, որ եթեր տրամադրվի. ըստ էության՝ իշխանությունները հեռուստաընկերության միջոցով խեղաթյուրում են ամեն ինչ: Փետրվարյան դեպքերից հետո ես եթերում չեմ եղել, դրանից առաջ էլ՝ «Կենտրոնով»:

Սերժ Սարգսյանի հետ չպետք է քննարկվեն սահմանադրական հոդվածները, քանզի դա նույն բանն է, որ Նաիրի Հունանյանը հանդես գար քրեական օրենսգրքի բարեփոխումներով: Սերժ Սարգսյանը բազմիցս խախտել է Սահմանադրությունը, և ինքը իրավունք չունի նախ նման առաջարկով հանդես գալ, ու բոլորս հասկանում ենք, որ դա ընդամենը վերարտադրության հարց է:
Տղաները բավականին մեծ դեր խաղացին համախմբելու համար, և պետք է քննարկումներն անել բաց, որովհետև իշխանությունները փորձում են աշխատել բոլորի վրա, պառակտում ստեղծել, հակասություններ…
Մենք ընդամենը մեկ խնդիր պետք է դնենք: Մնացածին պետք է հետո անդրադառնանք:
Ըստ էության, սա Սերժ Սարգսյանի վստահության հանրաքվեն է. քվեաթերթիկի վրա գրած են՝ Սերժ Սարգսյան և «Ո՛չ»: Մենք պետք է ընտրենք՝ «Ո՛չ»: Այստեղ ուրիշ խնդիր չկա, չպետք է խոսվի որևէ մեկի մասին՝ դա կլինի Քոչարյանը, Տեր-Պետրոսյանը: Ոչ մեկի մասին պետք չի խոսել. այստեղ մեկ խնդիր կա՝ Սերժ Սարգսյանն է: Մենք հասկանում ենք, որ Հանրապետականում ոչ ոք հարց լուծող չի, և ինքն այս համակարգով վաճառելու է մանդատները: Այն կուսակցությունները, որ նոր պետք է ստեղծվեն կամ ստեղծվել են արդեն, նրանք, ովքեր գնացել են ձողի վրա պարելու, մանդատներ կտրվեն, կունենան 81 մանդատ. խնդիր չկա: Հանրապետականի ցուցակում տարեցներից շատ քչերը կլինեն, հիմնականում՝ երիտհանրապետականները:

–Քաղաքական ի՞նչ զարգացումներ եք տեսնում:

–Ես փորձում եմ հույս կապել «Ո՛չ»-ի ճակատի հետ, որովհետև համոզված եմ՝ ժողովուրդը կանգնած է թիկունքում: Պարզապես պետք է ժողովրդին ճիշտ ձևակերպել խնդիրը, որ նա հասկանա՝ ինչ է նշանակում սահմանադրական փոփոխություններ, ինչ է նշանակում «Այո՛» ու «Ո՛չ»:
Ժողովուրդը կոգևորվի, եթե մեր մեջ հակասություններ չտեսնի: Հայաստանի ընդդիմադիր դաշինքները միշտ ինչ-որ հակասություններ ունեցել են: Միշտ մեջը մարդ են գցել, առանց գցելու էլ ոչ էական հարցի շուրջ սկսել են վիճել, ու խնդիր է առաջացել, որովհետև իշխանությունը ռեսուրս չունի:
Չկա որևէ պատճառ, որ ժողովուրդն այս իշխանություններին ձայն տա:

Մանրամասները՝ «Zham.am»–ում։