-Լևոն Տեր-Պետրոսյանի ելույթում արտառոց ոչինչ չնկատվեց,-ասել է «Օրինաց երկիր» խմբակցության ներկայացուցիչ Հովհաննես Մարգարյանը՝ «7օր»-ի հետ զրույցում գնահատական տալով Լևոն Տեր-Պետրոսյանի նոյեմբերի 11-ի ելույթին։

-Կարծիքս այն է, որ նա արտահայտել է իր հիմնական պատկերացումները, այն, ինչ ներկա իշխանությունների կողմից կատարվում է՝ կապված հայ-թուրքական հարաբերությունների բարելավման, սահմանների բացման հետ,-նշել է Հ. Մարգարյանը՝ հավելելով, որ Լ. Տեր-Պետրոսյանի ելույթը նորմալ է գնահատում։

Հարցին, թե պատգամավորն ինչպես է վերաբերվում հատկապես այն հատվածին, որ առաջին նախագահը հիմնական քննադատությունն ուղղել է երկրորդ նախագահին և նախկին արտգործնախարար Վարդան Օսկանյանին, Հ. Մարգարյանը պատասխանել է. «Այս առումով ոչինչ չեմ ուզում ասել, ու կոռեկտ չի լինի գնահատականներ տալ, քանի որ ինքը, որպես առաջին նախագահ, իր գնահատականների մեջ բավականին պարզ էր։ Ինքն արդեն իսկ տվել է իր գնահատականները»։

Ինչ վերաբերում է ելույթի վերջին հատվածին, որտեղ Լ. Տեր-Պետրոսյանը համեմատականներ է անցկացրել Եղիազար Այնթապցի անունով մի փառամոլ և իշխանատենչ հոգևորականի և Սերժ Սարգսյանի միջև, ապա Հ. Մարգարյանը տվեց հետևյալ պատասխանը.

-Ճիշտն ասած՝ ընթերցելիս այդ հատվածին այդքան լուրջ չեմ վերաբերվել։

7or.am