Հարցազրույց «Ազգային համաձայնություն» կուսակցության նախագահ Արամ Հարությունյանի հետ

–Հաշվի առնելով Հայաստանի ներքաղաքական այսօրվա իրավիճակը՝ ի՞նչ եք կարծում՝ իշխանությանը կհաջողվի՞ անցկացնել սահմանադրական փոփոխությունների նախագիծը։

–Համոզված եմ, որ այն քաղաքական ուժերը, քաղաքական և հասարակական գործիչները, որոնք սկզբունքային էին, եթե կարողանան «ոչ»–ի հստակ խնդիրը դնել և մոբիլիզացնել ժողովրդին, ապա իշխանությանը չի հաջողվի անցկացնել սահմանադրական փոփոխությունները։ Իշխանությունը «մերկացավ», և ակնհայտ երևում է, որ սահմանադրական փոփոխությունների այս նախագիծը Սերժ Սարգսյանի նախաձեռնած իշխանապահության քարտեզն է, և ամեն կերպ պետք է պատռել այդ քարտեզը։ Համոզված եմ, որ քաղաքական ուժերին կհաջողվի դա անել։

–Ի՞նչ է անհրաժեշտ այդ «իշխանապահության քարտեզը» պատռելու համար։

–Նախ՝ աշխատանք ժողովրդի հետ։ Եվ հետո պետք է ամբիցիաները մի կողմ դնել և միավորվել, դեպի կեղծ թիրախներ չշեղվել։ Այսօր օրակարգային միայն մեկ խնդիր կա՝ «ո՛չ» սահմանադրական փոփոխություններին։ Մնացած հարցերը երկրորդական են և շեղելու համար են։

–Ասում եք՝ հասարակական–քաղաքական հատվածը պետք է միավորվի։ Իսկ ժողովուրդը նորից ոտքի կկանգնի՞։

–Դա նույնպես կախված է քաղաքական ուժերից։ Ուղղակի պետք է բացատրել և մոբիլիզացնելու քայլեր ձեռնարկել։ Պետք է կարողանալ ժողովրդին այնքան հստակ բացատրել, թե ինչ կկատարվի, եթե այդ սահմանադրական փոփոխություններն ընդունվեն։ Ժողովուրդը պետք է հասկանա, որ այդ պարագայում իր ապագան շատ ավելի սարսափելի կլինի։ Կան նաև քաղաքական ուժեր, գործիչներ, ովքեր «միամիտ ձևով» տարբեր խնդիրներ են առաջ քաշում և փորձում են շեղել ժողովրդի ուշադրությունը։ Ազնիվ քյարփինջներ են, թե պատվեր են կատարում, դա այլ հարց է, բայց պետք է այդ ամենից զերծ մնալ։ Խնդիրը հստակ է. այսօր օրակարգում մե՛կ հարց կա՝ «ո՛չ» սահմանադրական փոփոխություններին, ինչը նշանակում է «ո՛չ» Սերժ Սարգսյանին, ինչն իր հերթին նշանակում է Հայաստանի համար ճանապարհ դեպի անվտանգ ապագա։

Հարցազրույցը վարեց Արեգնազ Մանուկյանը