Սեպտեմբերի 22-ին ՀՀ Ազգային ժողովի նախագահ Հովիկ Աբրահամյանն ընդունել է    Եվրոպական տարածաշրջանների ասամբլեայի (ԵՏԱ)    պատվիրակությանը' ասամբլեայի նախագահ, Իլ դե Ֆրանս ռեգիոնի փոխնախագահ Միշել Սաբբանի  գլխավորությամբ: Պատվիրակության կազմում էին Եվրոպական տարածաշրջանների ասամբլեայի     գլխավոր քարտուղար Կլաուս Կլիպը և ԵԽ ԽՎ անդամ, Ֆրանսիայի Ազգային ժողովի  հայ ֆրանսիական բարեկամական խմբի փոխնախագահ Ռենե Ռոուքեն:

Ողջունելով հյուրերին'Ազգային ժողովի նախագահը գոհունակությամբ փաստել է  Հայաստանի ու Ֆրանսիայի միջև բարեկամական հարաբերությունների բարձր մակարդակը և պատրաստակամություն է հայտնել նպաստել դրանց ամրապնդմանը բոլոր բնագավառներում:

Եվրոպական տարածաշրջանների ասամբլեային անդամակցում են եվրոպական 33 երկրների 270 շրջաններ /կամ մարզեր/ և 16 միջռեգիոնալ կազմակերպություններ: Ասամբլեայի     նախագահ Միշել Սաբբանը շնորհակալություն հայտնելով ջերմ ընդունելության համար'  նշել է, որ շրջանների միջև փորձի,  կարծիքների փոխանակումը նպաստում են  ժողովուրդների փոխըմբռմանը և մերձեցմանը: Նա հույս է հայտնել, որ արդեն այս տարվա նոյեմբերին' Ստամբուլում կայանալիք վեհաժողովի ժամանակ  Հայաստանի համայնքները ևս կանդամակցեն իրենց կազմակերպությանը:  Միշել Սաբբանի խոսքերով' իրեն հայտնի է, որ Ազգային ժողովի նախագահը լավատեղյակ է մարզերի ու տեղական ինքնակառավարման մարմինների աշխատանքին ու գործունեությանը, քանի որ երկար տարիներ Հովիկ Աբրահամյանը կառավարությունում համակարգել է նրանց աշխատանքը:

Հովիկ Աբրահամյանը կարևոր է համարել տեղական ինքնակառավարման մարմինների ու տարածաշրջանների համագործակցության գաղափարը և  բարձր է գնահատել Եվրոպական տարածաշրջանների ասամբլեայի գործունեությունն ու Հայաստանի համայնքների անդամակցությունն  այդ կազմակերպությանը, ինչը կնպաստի ՏԻՄ-երի կառույցի ամրապնդմանը, միջհամայնքային եւ միջշրջանային համագործակցությանն ու առկա խնդիրների համատեղ լուծմանը: Հայաստանի խորհրդարանի ղեկավարը կարևոր  է համարել ՏԻՄ-երին լայն լիազորություններով օժտելը և համայնքների ուժեղացումը:

ՀՀ Ազգային ժողովի նախագահն առաջարկել է ԵՏԱ-ի շրջանակներում Հայաստանում անցկացնել կովկասյան տարածաշրջանի երկրների համայնքների կոնֆերանս: