Բնության պահպանության համաշխարհային հիմնադրամի հայաստանյան գրասենյակի տնօրեն Կարեն Մանվելյանը լրագրողների հետ հանդիպման ժամանակ ասել է, որ Հայաստանում գնալով  ավելանում է Կարմիր գրքում գրանցված բուսատեսակների և կենդանատեսակների քանակը։

-Դա տարբեր գործողությունների հետևանքով է լինում։ Հանքարդյունաբերության, գերարածեցման հետևանքով են վերանում բուսատեսակները։ Փա՛ռք Աստծո, որ Հայաստանի կառավարությունը ստեղծել է պահպանվող նոր տարածքներ։ Դա «Արևիկ» ազգային պարկն է և Զանգեզուրը։ Այնտեղ գոյատևում  է 1500 բուսատեսակ, որոնցից 19-ն էնդեմիկ է, 50 տեսակը Հայաստանի Կարմիր գրքում է գրանցված, կենդանիների 12 տեսակ՝ միջազգային Կարմիր գրքում։ Դա բավական մեծ ցուցանիշ է և ունիկալ տարածք ողջ աշխարհում,-նշել է նա։

ՀՀ ԳԱԱ բուսաբանության ինստիտուտի տնօրեն Ժիրայր Վարդանյանն էլ նշել է, որ 1990թ. Հայաստանի Կարմիր գրքում ընդգրկված է եղել Հայաստանի բուսական աշխարհի բազմազանության մոտ 3500 տեսակից 12%-ը։

-Սակայն երեք տարվա ծրագիր է կազմվել, և վերանայվել է այդ տեսականին, որը վերջերս է քննարկվել Բնապահպանության նախարարությունում, շուտով կհաստատվի և լույս կտեսնի։ Այդ նոր Կարմիր գրքում  շատ տեսականի կա՝ մոտ 400-450 տեսակ։ Հայաստանի բուսական աշխարհի տեսականու  ընդհանուր թիվը 1000-1200 է, որից 800-850-ը, այսինքն՝  20-25%-ը Կարմիր գրքում է գրանցված,-ասել է նա։

7or.am