«Կովկասյան ինստիտուտ» հիմնադրամի տնօրեն, քաղաքագետ Ալեքսանդր Իսկանդարյանը լրագրողների հետ հանդիպման ժամանակ ասել է, որ վերջին մի քանի ամիսների ընթացքում մենք սովորել էինք նրան, որ քաղաքական իրադարձությունները բավական արագ են ընթանում։

-Այդ արագությունն, իհարկե, կապ ունի հայ-թուրքական հարաբերությունների հաստատման գործընթացի հետ, բայց ենթադրել, որ իրադարձություններ պետք է տեղի ունենան ամեն օր, այնքան էլ ճիշտ չէ։ Այս դադարը պայմանավորված է նոր իրադարձությունների սպասումով, որը պետք է տեղի ունենա կամ չունենա Թուրքիայի խորհրդարանում,-ասել է նա։

Ըստ քաղաքագետի՝ վերջին ժամանակներում Թուրքիայում տեղի ունեցող իրադարձությունները, մասնավորապես Թուրքիայի խորհրդարանի ծեծկռտուքը ցույց են տալիս, որ այնտեղ իրավիճակը բավական սուր է։

-Ես մի քանի օրից կլինեմ Թուրքիայում և կփորձեմ հասկանալ, թե ինչ է այնտեղ կատարվում։ Կարելի է ասել՝ սա դադար է,  կարելի է ասել՝ նախապատրաստությունն է ավելի մեծ իրադարձություններին, որ մեզ սպասվում են։ Ինչ վերաբերում է Թուրքիայի կողմից արձանագրությունների վավերացմանը, ապա կարող է լինել մի քանի սցենար։ Առաջինի դեպքում  հնարավոր է այն վավերացվի հունվարի վերջին կամ փետրվարի սկզբին։ Տրամաբանությունն այն է, որ մինչև ապրիլ նախապատրաստվեն սահմանի բացմանը։ Երկրորդի դեպքում հնարավոր է  մոտավորապես ապրիլ ամսին՝ ապրիլի սկզբին։ Հնարավոր է  նաև, որ փակ ռեժիմով քվեարկություն լինի, և այդ դեպքում թե՛ դրականի, թե՛ բացասականի դեպքում Թուրքիան կարող է արդարանալ։ Դրականի դեպքում կասի, որ չգիտենք, թե ով է կողմ քվեարկել, իսկ բացասականի դեպքում միջազգային հանրությանը կասի՝ ժողովրդավարություն է, և իրենք արել են ամեն ինչ։  Եվ հնարավոր է, որ հարցը չլուծվի, այսինքն՝ չվավերացվի,-նշել է նա։

«7օր»-ի այն հարցին, թե արդյոք ո՞ր սցենարն է ավելի հավանական՝ վավերացնե՞լը, թե՞ չվավերացնելը, Ալեքսանդր Իսկանդարյանը  պատասխանել է, թե  չգիտի։

7or.am