Ադրբեջանական «Vesti.az»-ը հարցազրույց է վերցրել ԼՂՀ–ում բնակություն հաստատած ռուսաստանցի միլիարդատեր Գերման Ստերլիգովի փաստաբան Արթուր Հայրապետովի հետ, որը մասնակի կրճատումով ներկայացնում ենք ձեր ուշադրությանը:

- Ինչո՞ւ նա որպես նոր բնակավայր ընտրեց հենց Լեռնային Ղարաբաղը:

-Նա այնտեղ շատ ընկերներ եւ ծանոթներ ունի: Նրանք կօգնեն հաստատվել նոր տեղում՝ ստեղծել երկրորդ Սլոբոդան: Այն, ինչի համար Գերմանը Լվովիչը պայքարել է տարիներ շարունակ՝ մաքուր բնություն, սննդամթերք, Ղարաբաղում կա: Հենց այդ պատճառով էլ նա կանգ առավ Լեռնային Ղարաբաղի վրա:

-Պատահաբար դո՞ւք չեք նրան առաջարկել հաստատվել Լեռնային Ղարաբաղում:

-Առաջինը ես եմ նրան հրավիրել ԼՂՀ: Հետագայում նրան դուր եկավ:

-Արդեն հայտնի՞ է, թե կոնկրետ որտեղ է նա ապրելու:

-Նա դեռ վերջնական որոշում չի կայացրել, թե արդյոք երկար է այնտեղ մնալու, թե ոչ: Ամեն դեպքում, նա այնտեղ սեփականություն կունենա:

-Նա գիտե՞ր, որ անօրինական է այցելել «բռնազավթված» ադրբեջանական տարածքները:

-Նա այդ քայլին գնացել է լիովին գիտակցված: Եկեք չխոսենք քաղաքականությունից:

-Սա ոչ թե քաղաքական, այլ իրավական թեմա է: Գերման Լվովիչը, փաստորեն, խախտել է Ադրբեջանի օրենքները եւ հայտնվում է Ադրբեջանի ԱԳ նախարարության «սեւ ցուցակում»:

-Կարծում եմ, որ նրա համար դա ոչ մի նշանակություն չունի:

Աղբյուրը՝ «Top-News.am»