Հայաստանի փոխոստիկանապետ Հովհաննես Հունանյանը «Ազատություն» ռադիոկայանի հետ հարցազրույցում ասել է, որ իր տեղեկություններով, Ոստիկանությունը մերժել է վերջին հինգ տարում Հայաստանում մշտապես բնակվելու վերաբերյալ տեղեկանք տրամադրել Երևանի թիվ 10 ընտրատարածքում Ազգային ժողովի պատգամավորի լրացուցիչ ընտրություններում թեկնածություն առաջադրած Էդուարդ Մադաթյանին։

Անցած շաբաթ մերժվել էր նաև նույն ընտրատարածքում թեկնածություն առաջադրած Նիկոլ Փաշինյանին համանման տեղեկանք տրամադրելու հարցը՝ պատճառաբանելով, որ վերջինս՝ «26.02.2008 թվականից մինչև 07.07.2009 թվականը գտնվել է հետախուզման մեջ և հետախուզման մեջ գտնվելու ժամանակահատվածում Հայաստանի Հանրապետությունում չի բնակվել»։

Նույն ընտրատարածքում առաջադրված թեկնածու՝ տրանսպորտի և կապի նախկին նախարար Էդվարդ Մադաթյանի նկատմամբ 2004 թվականին քրեական գործ էր հարուցվել «պետական բարձրաստիճան պաշտոնյաների դեմ մահափորձ կազմակերպելու հատկանիշներով»։ 2004 թվականի դեկտեմբերի 6-ից 2005-ի հուլիսը՝ մինչև գործի քննության կասեցումը, Մադաթյանը նույնպես գտնվել է հետախուզման մեջ։