Հունգարիա պետական այցով ժամանած ՀՀ Նախագահ Սերժ Սարգսյանին ուղեկցող պատվիրակության կազմում գտնվող ՀՀ արտգործնախարար Էդվարդ Նալբանդյանը նոյեմբերի 9-ին հանդիպել է իր հունգարացի գործընկեր Պետեր Բալաշի հետ: Սա վերջին տարվա ընթացքում Հայաստանի ու Հունգարիայի արտգործնախարարների հինգերորդ հանդիպումն էր:

Նախարարներ Նալբանդյանն ու Բալաշը, բարձր գնահատելով հայ-հունգարական հարաբերություններում վերջերս արձանագրված ակտիվացումը, նշեցին, որ ՀՀ Նախագահի պետական այցելությունը Հունգարիա նշանավորում է այն կարեւորությունը, որ երկու երկրները տալիս են երկկողմ բարեկամական հարաբերությունների առավել խորացմանն ու ամրապնդմանը:

Էդվարդ Նալբանդյանն ու Պետեր Բալաշը, կարեւորելով ՀՀ Նախագահի պետական այցի ընթացքում ձեռք բերված պայմանավորվածությունները եւ ստորագրված փաստաթղթերը, վստահություն են հայտնել, որ դրանց կյանքի կոչումը լուրջ խթան կհանդիսանա համագործակցության հետագա զարգացման համար:

Հայաստանի եւ Հունգարիայի արտաքին քաղաքական գերատեսչությունների ղեկավարները մտքեր փոխանակեցին երկկողմ փոխգործակցության մի շարք ոլորտներին վերաբերող հարցերի շուրջ, քննարկեցին ԵՄ-ում ընթացող գործընթացները եւ Հարավային Կովկասի տարածաշրջանի վերջին զարգացումները: