ՀՀ Ոստիկանության Անձնագրային և Վիզաների վարչության Իջևանի բաժանմունքը ապօրինաբար հրաժարվել է Նիկոլ Փաշինյանին տրամադրել տեղեկանք' վերջին հինգ տարին Հայաստանում մշտապես բնակվելու մասին: 

Հայկական քաղաքական դաշտում հերթական անգամ ականատես ենք լինում մի երևույթի, երբ մինչև կոկորդը կրիմինալի մեջ թաթախված իշխող վարչախումբը իր հերթական հանցագործության կատարող է ընտրում ՀՀ իրավապահ համակարգի վերոնշյալ կառույցը: Սա հետևանք է այն երևույթի, որ ոստիկանական այդ ստորաբաժանման թեթև ձեռքով «Նոր Ժամանակներ» կուսակցության ղեկավար Արամ Կարապետյանը նախ 2003        թ-ին զրկվեց ՀՀ ԱԺ պատգամավորության թեկնածուի գրանցումից, այնուհետև, 2007 թ-ին' անհեթեթ ձևակերպումով գրությամբ նրան մշտական բնակության մասին տեղեկանք չտրամադրեցին, ինչի արդյունքում Արամ Կարապետյանը չգրանցվեց ՀՀ Նախագահի  թեկնածու:

Գնահատելով ստեղծված իրավիճակի լրջությունը «Նոր Ժամանակներ» Կուսակցության Վարչությունը   հ ա յ տ ա ր ա ր ու մ   է.

1.  Իշխող վարչախումբը ՀՀ Ոստիկանության Անձնագրային և Վիզաների Վարչությունն իր համապատասխան ստորաբաժանումների հետ միասին դարձրել է ձեռքի գործիք և պարբերաբար քաղաքական հաշվեհարդար է տեսնում իշխանության համար անցանկալի քաղաքական գործիչների հետ, զրկելով նրանց ընտրվել ՀՀ Ազգային Ժողովի պատգամավոր կամ ՀՀ Նախագահ:

2. Իրավապահ համակարգի այդ կառույցի հակաօրինական գործունեության հետևանքով փաստորեն լուրջ հարված է հասցվում մեր պետական անվտանգությանը, հատկապես, երբ նրա կողմից տրամադրվող փաստաթղթերը կարող են առաջացնել լուրջ խնդիրներ այլ երկրների հետ:         

                                            «Նոր Ժամանակներ» Կուսակցության  Վարչություն