«Коммерсант» պարբերականը տեղեկացրել էր, որ Մոսկվան և Թբիլիսին փակ ռեժիմով վարում են տեխնիկական բանակցություններ, և նախորդ շաբաթ Երևանում «Վերին Լարս» անցակետի բացման շուրջ անց են կացվել փակ բանակցություններ։ Հղում կատարելով ՌԴ ԱԳՆ-ին՝ պարբերականը նաև տեղեկացրել է, որ անցակետի աշխատանքների վերականգման գրեթե բոլոր հարցերը համաձայնեցված են։ Այս հարցի հետ կապված պարզաբանումներ ստանալու համար «7օր»-ը կապ է հաստատել Հայաստանում Վրաստանի նորանշանակ դեսպան Գրիգոլ Տաբատաձեի հետ։

Նա նշել է, որ եռակողմ բանակցություններ չեն եղել։

-Մենք  մի քանի անգամ նշել ենք, որ պատրաստ ենք բացել «Վերին Լարս» անցակետը, որպեսզի օգնենք մեր  բարեկամներին, առաջին հերթին՝ Հայաստանին։ Բանակցությունները վրացական կողմը վարում է Հայաստանի հետ, իսկ Հայաստանն իր հերթին ռուսական կողմի հետ, այսինքն՝ ուղիղ բանակցություններ մենք չենք տանելու։

Այն հարցին, թե ինչպե՞ս կավարտվեն այս բանակցությունները, նա պատասխանել է, որ իրենք ցանկանում են, որ այդ  բանակցություններն ավարտվեն  անցակետի բացումով։

-Իսկ թե ինչպես կավարտվեն, դա արդեն միայն մեզնից չի կախված,-ասել է նա։

7or.am