ՀՀԿ խմբակցության քարտուղար Էդուարդ Շարմազանովը լրագրողների հետ հանդիպման ժամանակ ասել է, որ հայ-թուրքական արձանագրությունների վավերացման գործընթացը պետք է իրականցվի խելամիտ ժամկետներում։

-Մեջլիսը վավերացնի, մենք էլ կվավերացնենք։ Դա ոչ թե պայման է, այլ տրամաբանական քայլ։ Անկարան է փակել սահմանը, և նա է միշտ նախապայմանների լեզվով խոսել։ Իհարկե, մենք ավելի բարոյական հիմք ունենք նախապայմաններ դնել և ասել, որ Ցեղասպանությունը ճանաչեն,-ասել է նա։

Ըստ Էդուարդ Շարմազանովի՝ դեկտեմբերի 7-ին լրանում է հայ-թուրքական արձանագրությունների վերաբերյալ Թուրքիայի խորհրդարանի արտաքին հարաբերությունների հանձնաժողովի վերջնական եզրակացություն ներկայացնելու վերջնաժամկետը։

-Կարծիքը դրական է լինելու։ Դեկտեմբերի 7-ին տեղի կունենա Էրդողանի այցը Վաշինգտոն, որտեղ նա կհանդիպի Օբամայի հետ։ Կարծում եմ՝ Թուրքիայի խորհրդարանի արտաքին հարաբերությունների հանձնաժողովի վերջնական եզրակացությունը դրական  է լինելու. եթե դրական եզրակացություն չտան, ապա նրան Վաշինգտոնում ոչ միայն գրկաբաց չեն ընդունի, այլ ընդհանրապես չեն ընդունի, որովհետև բոլորիս էլ հայտնի է պաշտոնական Վաշինգտոնի դիրքորոշումը, որը բազմաթիվ անգամներ է հորդորել Թուրքիային այս խնդրում նախապայմաններ չդնել,-ասել է նա։

Նրա խոսքերով՝ Հայաստանը որևէ միակողմանի պարտավորություն չի ստանձնելու հայ-թուրքական հարաբերություններում։

-Եթե Թուրքիան չի վավերացնում, ուրեմն մենք էլ չենք վավերացնում, պրոցեսը վերջանում  է։ Կարող է՝ գնանք,  թուրքերին ասենք՝ խնդրում ենք, վավերացրե՞ք։ Ո՛չ։  Եթե Թուրքիան ստորագրել է, ուրեմն պետք է վավերացնի։ Դավութօղլուն հո իրենց Ստամբուլի ժէկի պե՞տը չի։ Դավութօղլուն ներկայացնում է Թուրքիայի պետական քաղաքականությունը, ինչպես արտաքին հարաբերություններում մեր կարծիքն է ներկայացնում Էդվարդ Նալբանդյանը։ Եթե չպիտի վավերացնեին, ինչո՞ւ էին ստորագրում,-ասել է ՀՀԿ խմբակցության քարտուղարը։

 7or.am