«Բարգավաճ Հայաստան» կուսակցության նախագահի մամլո խոսնակ Խաչիկ Գալստյանը «Փաստարկ» ակումբում խոսելով ՀՀ ներքաղաքական զարգացումների մասին՝ ասել է, որ քաղաքականությունը դինամիկ երևույթ է, և ոչ մի բան հավերժ չէ.

-Ամեն քաղաքական գործընթաց կարող է սկիզբ հանդիսանալ նոր քաղաքական իրողության, և չի բացառվում, որ ապագայում քաղաքական ուժերի վերադասավորումները Հայաստանում նույնպես փոխվեն,- նշել է Խ. Գալստյանը,- այնքան էլ սարերի հետևում չեն ընտրական նոր գործընթացները. 2012-ին նախատեսվում են ընտրություններ, և եթե ամեն ինչ իր հունով գնա, առնվազն մյուս տարվա կեսերից մենք կնկատենք քաղաքական ակտիվացում կամ նախընտրական նոր ընտրապայքարների նախապատրաստման աշխատանքներ։ Իսկ այստեղ ընդդիմադիր ֆորմատ կլինի, նոր բևեռների ի հայտ գալ կլինի։

Խ. Գալստյանը նաև հավելել է, որ ԲՀԿ նախագահի աշխատանքային գրաֆիկը բավական հագեցած է, և մասնավորապես նոյեմբեր ամսին Բորիս Գրիզլովի հրավերով Գագիկ Ծառուկյանը մեկնելու է Սանկտ-Պետերբուրգ՝ մասնակցելու «Եդինայա Ռոսիա» կուսակցության համագումարին։ Վերջերս էլ ԲՀԿ նախագահի գլխավորած պատվիրակությունը վերադարձել է Ուկրաինայից, որտեղ Վիկտոր Յանուկովիչի հրավերով մասնակցել է «Տարածաշրջանների կուսակցության» համագումարին։ 2008թ. ԲՀԿ-ն և «Տարածաշրջանների կուսակցությունը» միջկուսակցական համագործակցության համաձայնագիր են ստորագրել։

7or.am