«Պոլիտէկոնոմիա» հետազոտական ինստիտուտի տնօրեն Անդրանիկ Թևանյանն «Արմատ» մամուլի ակումբում հայտարարել է, որ «ֆուտբոլային» դիվանագիտության վերաբերյալ մի քանի սխալ մեկնաբանություններ և միֆեր կան։ Առավել տարածվածն այն է, որ այս դիվանագիտությունը դրսի ուժերի ճնշման արդյունք է։ Սակայն ՀՀ նախագահ Սերժ Սարգսյանն ինքն է վստահեցրել, որ Թուրքիայի հետ հարաբերությունները բարելավելու նախաձեռնությունն իրենն է.

-Այս դինավագիտությունը նախաձեռնել է Սերժ Սարգսյանը և  նախաձեռնելու պահից սկսած՝ կորցրել է ազդեցությունը իրավիճակի վրա,-նշել է Ա. Թրանյանը։-Անընդհատ կրկնում են, թե այժմ գնդակը Թուրքիայի դաշտում է։ Միգուցե Թուրքիայի դաշտում է, բայց Հայաստա՛նը խաղի մեջ չէ։

«Ֆուտբոլային» դիվանագիտության հետևանքով Հայաստանը փաստացի հայտնվել է խաղից դուրս վիճակում և բացի բացասական դիվանագիտական հաշվեկշռից՝  ուրիշ որևէ այլ բան չի ստացել։ Համոզված լինելով սրանում՝ Ա. Թևանյանը նշել է, որ, փոխարենը Թուրքիան ստացել է սահմանների ևս մեկ անգամ ամրագրում, Հայոց ցեղասպանության ճանաչման դադարեցում և որ ամենավտանագավորն է՝ Սերժ Սարգսյանի համաձայնությամբ ներքաշվել է Ղարաբաղի հարցի մեջ։

-Սա դիվանագիտական անգրագիտության, քաղաքական անհեռատեսության և պարզ դիլետանտիզմի հետևանք է։ Ուրիշ ոչ մի բան,- նշել է «Պոլիտէկոնոմիա» հետազոտական ինստիտուտի տնօրենը՝ համոզված լինելով, որ հայ-թուրքական արձանագրությունները Թուրքիան չի վավերացնի այնքան ժամանակ, մինչև որ Ղարաբաղի հարցում զիջումներ չստանա։

Ստեղծված իրավիճակից նվազագույն կորուստներով դուրս գալու ելքն էլ Ա. Թևանյանը տեսնում է  հետևյալում՝ Հայաստանը պետք է կոշտացնի իր դիրքորոշումը Արցախի խնդրում, քանի որ դա ողջ Հայաստա՛նի անվտանգության հարցն է. ցանկացած զիջում կհանգեցնի պատերազմի։

-Արցախի հարցում դիրքորոշման կոշտացումը հնարավորություն կտա անուղղակի ճնշում գործադրել Թուրքիայի վրա։

Իսկ Հայոց ցեղասպանության ճանաչման գործընթացին հարված հասցնելուց հնարավոր չի լինի խուսափել, ինչը կկարողանա հետ «պտտեցնել» միայն բոլորովին այլ գաղափարախոսություն և մոտեցումներ ունեցող նոր իշխանությունը։

-Զարմանալին այն է, որ այսօր Հայաստանում իշխանությունը շատ թույլ է, բայց չկա այն քաղաքական ուժը, որը կվերցնի այդ իշխանությունը,- ասել է Ա. Թևանյանը՝ կարծիք հայտնելով, որ նոր ուժը կձևավորվի մինչև 2012թ.։

Ի դեպ, հատկանշական է, որ թեև այս օրերին հայ-թուրքական հարաբերությունները քննարկաման և լուսաբանման առաջնային թեման են, սակայն «Արմատ» ակումբում հրավիրված Անդրանիկ Թևանյանի ասուլիսին հեռուստաընկերություններից որևէ մեկը ներկա չի եղել։

7or.am