«Կովկասյան ինստիտուտի» տնօրեն, քաղաքագետ Ալեքսանդր Իսկանդարյանը լրագրողների հետ հանդիպման ժամանակ ասել է, որ հայ-թուրքական հարաբերությունների հաստատման գործընթացը դեռ չի ավարտվել։

-Գործընթացն ընթանում է, և թե ինչ կլինի հաջորդիվ, ինչպես Թուրքիայում կընթանա վավերացման հարցը խորհրդարանում, ապագան ցույց կտա։ Իսկ թե ինչ կլինի, երբ այս ամենը կլինի, այնքան էլ ճիշտ չէ,-ասել է նա։

«7օր»-ի այն հարցին, թե հաշվի առնելով այն հանգամանքը, որ թուրքական բարձրաստիճան դեմքերը հայտարարում են, որ արձանագրությունները չեն վավերացվի առանց ղարաբաղյան հակամարտության հարցի կարգավորման՝ էլի մնո՞ւմ է այն կարծիքին, որ այս գործընթացը դրական է, Ալեքսանդր Իսկանդարյանը պատասխանել է, թե ինքը չի ասել՝ դրական է կամ դրական չէ։

-Ես ասում եմ, որ կա գործընթաց, և այն ընթանում է։ Այն մարդիկ, ովքեր կարծում են, որ կարգավորումը պետք է լինի, այս գործընթացը դրական է, այն մարդանց համար, ովքեր մտածում են՝ Հայաստանը պետք է փակ լինի, դա բացասական գործողություն է։ Իմ գործը չէ դատել՝ նրանցից ով է ճիշտ, բայց այս գործընթացը շարունակում է ընթանալ։ Ինչ վերաբերում է թուրք կամ հայ պաշտոնատար դեմքերի հայտարարություններին, ինձ հասկանալի է, թե ինչու են դրանք արվում, և հասկանալի է, թե որ քաղաքական դաշտի վրա են նրանք աշխատում,-նշել է նա։

Ըստ Ալեքսանդր Իսկանդարյանի՝ 15 տարի մեզ փաստացի ասվում էր, որ եթե կարգավորենք Ղարաբաղի հարցը, թուրքերը կբացեն սահմանը։

-15 տարի դա չի աշխատել։ Ի՞նչ է եղել, ինչո՞ւ միանգամից այն պետք է աշխատի այսօր։ Եթե 3 շաբաթում պետք է լուծվի Ղարաբաղի հարցը, ու նոր սահմանը բացվի, ինչի՞ համար էին արձանագրություններն այս տեսքով։ Կվավերացվեն արձանագրությունները, թե չեն վավերացվի, գործընթացը կանգ կառնի կամ կշարունակվի, Ղարաբաղի հարցի վրա դժվար թե ազդի,-նշել է քաղաքագետը։

7or.am