-Հայ-թուրքական այս գործընթացների վերաբերյալ կլինեն և՛ կողմ, և՛ դեմ արտահայտվողներ։ Յուրաքանչյուր հայ քաղաքացու, հայ մարդու հուզում է այս խնդիրը։ Ինչ վերաբերում է մտահոգություններին, ապա յուրաքանչյուր բանական մարդ պետք է դրանք ունենա, բայց երբ մանրակրկիտ ուսումնասիրում ենք այդ փաստաթուղթը, ապա զգում ենք, որ այնտեղ արծարծվում է  երկու կարևոր հարց՝ առանց նախապայմանների են հարաբերություններ հաստատում և  ԼՂ խնդիրը դրված չէ։ Իսկ ինչ վերաբերում է  Ցեղասպանությանը, ապա դա անբեկանելի փաստ է, և հարցը չի դառնալու քննարկման առարկա,-խոսելով հայ-թուրքական հարաբերություների և նախաստորագրված արձանագրությունների մասին՝ ասել է «Օրինաց երկիր» խմբակցության պատգամավոր Հովհաննես Մարգարյանը։

 «7օր»-ի այն հարցին, թե եթե Ցեղասպնության հարցը քննարկման առարկա չէ, ապա ինչպե՞ս կմեկնաբանի, որ Թուրքիայի նախագահ Աբդուլլա Գյուլը երեկ օտարազգի պատմաբաններին  կոչ է արել մասնակցելու Ցեղասպանության հարցի քննարկմանը, նա պատասխանել է, թե այդ ուսումնասիրությունները կարող են վերաբերել միայն Ցեղասպանության հետևանքներին։

-Ես այդ հայտարարությունը կհամադրեմ մեր նախագահի, մեր արտագործնախարարի հայատարություններին, որտեղ ասվում է, թե Ցեղասպանութան հարցը չի կարող դառնալ քննարկման առարկա։ Իսկ միջգերատեսչական հանձնաժողովներ պետք է լինեն, որ իմանանք, թե կոնկրետ ինչ է եղել յուրաքանչյուր ընտանիքի հետ։  Ցեղասպանության հարցը անբեկանելի  է, և շարունակական գործընթացը բերում է նրան, որ, իմ կարծիքով, Թուրքիան կճանաչի Ցեղասպանությունը, իսկ ուսումնասիրությունները Ցեղասպանության հետևանքներին են ուղղված լինելու։ Բացի այդ՝ ինչո՞ւ  ենք մեկնաբանության առարկա դարձնում թո՛ւրք ղեկավարների ասածը,-նշել է Հովհաննես Մարգարյանը։

Իսկ թե երբ կբացվի հայ-թուրքական սահմանը, նա դժվարացել է հստակ պատասխանել։

-Դա կարող է լինել մի քանի օրվա, մի քանի ամիսների ընթացքում, չեմ կարող ասել,-ասել է նա։

7or.am