Հայ հասարակության առաջընթացի համար կարևոր նշանակություն ունեցող ժամանակաշրջանում Հայաստանում, Արցախում և Սփյուռքում ընթանում են հանրային քննարկումներ հայ-թուրքական հարաբերությունների և նախաստորագրված արձանագրությունների վերաբերյալ: Փաստ է, որ հայ-թուրքական հարաբերություններն աստիճանաբար թևակոխում են աննախադեպ  ու որակապես նոր փուլ:

Հանրային քննարկումների արդյունքում հնչում են տարբեր, հաճախ տրամագծորեն հակառակ և իրարամերժ կարծիքներ, գնահատականներ, հայտարարություններ: Խնդրո առարկա հարաբերությունների վերաբերյալ բարցրաձայնվում են տարբեր մտահոգություններ: Մենք հարգանքով և ամենայն լրջությամբ ենք վերաբերում բոլոր հնչեցված կարծիքներին, գնահատականներին, արված հայտարարություններին, կիսում ենք բազմաթիվ մտահոգություններ:

Կարևորելով հայ-թուրքական հարաբերությունների կարգավորման հետագա գործընթացը, անընդունելի համարելով հայ-թուրքական հարաբերությունների հաստատման հետ կապված որևէ նախապայման, Հայոց Ցեղասպանության միջազգային ճանաչման և դատապատման ճանապարհին որևէ նահանջ, արցախյան հիմնախնդրի կարգավորման գործընթացում հայկական կողմի շահերին չհամապատասխանող որևէ զիջողական կեցվածք և թուրքական կողմի որևէ ներգրավում՝ մեր զորակցությունն ենք հայտնում Հայաստանի Հանրապետության ղեկավարությանը հայ-թուրքական երկխոսության արդյունավետ զարգացման գործում:  

Հայաստանի երիտասարդ իրավաբանների ասոցիացիա

Ինտեգրացիոն գործընթացների աջակցության կենտրոն

Քաղաքական գիտությունների հայկական ասոցիացիա

Հայաստանի եվրոպական շարժում

Հայաստանի իրավաբանական հիմնադրամ

«Կովկաս» հասարագիտական հետազոտությունների կենտրոն

«Պրոգրես» սոցիալական հետազոտությունների կենտրոն

«Հասարակական քարոզչություն» հասարակական կազմակերպություն