Ինչպես հաղորդում է «AFP» գործակալությունը,  կառավարության դեմ ուղղված բողոքի զանգվածային գործողությունների պատճառով առաջացած գների կտրուկ անկումից հետո՝ հունվարի 27-ին, եգիպտական ֆոնդային բորսայում առևտրային գործարքների կնքումը դադարեցվել է։ EGX 30 փոխանակման հիմնական ցուցանիշն ընկել է 6,2 տոկոսով, իսկ նախորդ նստաշրջանում այն ընկել էր ռեկորդային 6 տոկոսով։

Մոսկվայի ժամանակով 12:30-ին այդ ցուցանիշը շարունակել է անկում ապրել և հասել է 10 տոկոսի։ Տարվա սկզբից ցուցիչն արդեն 21 տոկոսով իջել է։

Եգիպտոսում զանգվածային անկարգությունները շարունակվում են արդեն մի քանի օր։  Եգիպտացիները պահանջում են նախագահ Հոսնի Մուբարաքի հրաժարականը, որը շուրջ  30 տարի ղեկավարում է երկիրը։

Այս օրերին անկարգությունների հետևանքով 6 մարդ է զոհվել, որոնց թվում կան և՛ ցուցարարներ, և՛ ոստիկաններ։

Ցուցարարներին ոգեշնչել են մեկ այլ հյուսիսաֆրիկյան պետության՝ Թունիսի դեպքերը, որտեղ ժողովրդական զանգվածային խռովությունը հանգեցրեց Զին էլ Աբիդինա Բեն Ալիի վարչակարգի անկմանը։