Հարցազրույց «Բարգավաճ Հայաստան» խմբակցության քարտուղար Նաիրա Զոհրաբյանի հետ

–«2015թ. հունվարի 12-ին Գյումրիում տեղի ունեցած ողբերգական դեպքերի հետ կապված իրավական գործընթացների մասին» թեմայով այսօրվա խորհրդարանական լսումները Ձեր սպասումները բավարարեցի՞ն, կամ, ընդհանրապես, ունեի՞ք սպասելիք։

–Օրակարգում նշված էր, որ լինելու է ՀՀ գլխավոր դատախազի զեկույցը, և ես ակնկալում էի, որ, իհարկե, պահպանելով նախաքննության գաղտնիությունը՝ գոնե ինչ–որ տեղեկատվություն պիտի տրամադրվեր։ Փաստորեն, գլխավոր դատախազը հանդես եկավ հուզական, էմոցիոնալ ելույթների մասին խոսքով, որը կարող էր ցանկացած հոգևորական գալ այստեղ, և մեզ բացատրել, թե ինչպես պետք է հաղթահարել վիշտը և սուգը։ Որևէ կոնկրետ հարցադրման որևէ կոնկրետ պատասխան չտրվեց, և այսօր, ինչպես և 9 օր առաջ, մենք ունենք շատ ավելի մեծ հարցեր և հարցականներ, քան որևէ կոնկրետ հարցի պատասխան։ Այնպես որ, սպասենք ընթացքին, բայց ես անձնապես լավատես չեմ, որ մենք շատ ավելի կոնկրետ և հստակ հարցերի պատասխաններ մոտ ժամանակում կունենանք։

–ԱԺ պետաիրավական հարցերի մշտական հանձնաժողովի նախագահ Հովհաննես Սահակյանը լսումների ամենավերջում, թերևս անկախ իրենից էլ, անկեղծության պոռթկում ունեցավ՝ հայտարարելով, թե այս լսումներով ձախողեցին ԱԺ լիագումար նիստը շոուի վերածելու որոշ մարդկանց մտադրությունը։ Փաստորեն, կարևորագույն հարցի շուրջ հրավիրված լսումները հենց ա՞յդ նպատակն էին հետապնդում։

–Այո՛, տպավորություն կա, որ խնդիրը մեկն էր՝ անել հնարավորը, որպեսզի մեկնարկող լիագումարը ընթանա իրենց նախագծած սցենարով։ Բայց ես կարծում եմ, որ որևէ պատգամավոր, հանձնաժողովի որևէ նախագահ, ԱԺ–ի ղեկավարության որևէ անդամ, անկախ իրենց ծրագրած սցենարից, չի կարող և որևէ իրավունք չունի և չի ունենալու՝ արգելելու որևէ պատգամավորի խորհրդարանում, ԱԺ կանոնակարգ օրենքի համաձայն, բարձրացնել այն հարցերը, որոնք ինքը նպատակահարմար է գտնում։ Եվ եթե այսօրվա հրավիրված խորհրդարանական լսումների նպատակը դա էր, ապա պետք է ասեմ, որ իրենք իրենց նպատակում ձախողեցին։ Այս խնդիրը բարձրացվելու է անընդհա՛տ և հետևողականորե՛ն։

–Տեսակետ կա, որ ՀՀ իշխանությունները նման նվաստացուցիչ կեցվածք էին ընդունել հենց Կրեմլի հրահանգով։ Բայց արդյոք չե՞ք կարծում, որ իրականում սա «նախաձեռնողական» նվաստացում էր։

–Գիտեք, ես միայն մեկ բան կարող եմ ասել։ Իմ տպավորությամբ՝ Հայաստանում շատ տևական ժամանակ բացարձակ անիշխանություն է։

Հարցազրույցը վարեց Արեգնազ Մանուկյանը