Նախատոնական օրերին համացանցում մի քանի «հուժկու» նախաձեռնությունների հանդիպեցի եւ նաեւ «արմատական» հայտարարությունների ծանոթացա:

Ֆեյսբուքյան ակտիվիստների մի խումբ, որը «վճռական գործողությունների» կողմնակից է, բոլորին կոչ արեց չդիտել-չլսել Սերժ Սարգսյանի ամանորյա շնորհավորհական ուղերձը:

«Ֆեյսբուքում» սույն թեմայով խումբ ստեղծեցին եւ սկսեցին օրերով քննարկել այդ հարցը:

Համաձայնե՛ք, որ առաջարկը շատ «հեղափոխական» է, ավելին՝ դրանով նրանք ահավոր վտանգավոր քայլի են դիմել:

Մտածեցի՝ ուր որ է կհայտնվի փոխոստիկանապետ Երանոսյանը եւ մեկ առ մեկ կկտրի նախաձեռնության ակտիվիստների ականջները, կամ էլ կջարդի նրանցից մի քանիսի գլուխը, ովքեր ՖԲ-ի խմբում գրառումներ են կատարում՝ երդվելով, որ Ամանորի գիշերը չեն լսելու Սերժ Սարգսյանի ուղերձը:

Այն էլ՝ Երանոսյանը չհայտնվեց, իսկ ակտիվիստները մինչ օրս շարունակում են ակտիվորեն քննարկել նշված հարցը:

Ա՛յ, իսկական «ընդդիմությունն» այսպիսին պետք է լինի: Պետք է եռագույն դրոշներով զարդարի ՖԲ-ի իր պատը, նստի համակարգչի առաջ եւ կոչ անի չլսել Սարգսյանի ելույթը:

Իր այդ քայլով նա թեկուզ մեկ օրով արագացնում է իշխանափոխության պահը:

Երեւի նախագահականում տեղյակ են սույն «նախաձեռնողական» քայլի մասին ու արդեն շեֆին հորդորել են, որ հեռուստաէկրանին չերևա, քանզի, միեւնույն է, իրեն լսող չկա:

Դե որ լսող չկա, Սերժ Սարգսյանն էլ կվհատվի ու հունվարի 1-ին հրաժարական կտա:

Ասե՛ք, որ ավելի հզոր ու վճռական պայքար վարչախմբի դեմ հնարավոր չէր պատկերացնել, քան վիրտուալ տարածքում Սարգսյանի ուղերձը բոյկոտելու կոչն է:

Չգիտենք, թե այս նախաձեռնությունն ինչ արդյունք կարձանագրի, բայց հուսով ենք, որ ՖԲ-ի նույն «հեղափոխական» ակտիվիստները գալիք տարում, ավելի ստույգ՝ գարնանը, բոլորիս կոչ կանեն բոյկոտել սահմանադրական փոփոխությունների հայեցակարգը եւ հանրաքվեն:

«Ֆեյսբուքում» եղան նաեւ օգտատերեր, ովքեր նախատոնական օրերին բոլորին կոչ արեցին Ամանորի սեղանի հարցով չզբաղվել ու զուր տեղը չմտահոգվել, որ չեն կարողանում հավուր պատշաճի տոնել Նոր տարին: Հայտարարեցին, թե եկեք միայն թեյ ու սուրճ խմենք, եւ այդ կերպ դիմավորենք Ամանորը:

Սրանց ասածն այն է, թե, իբր, հայերը պետք է ձերբազատվեն ցուցամոլությունից ու սեղանները ծանրաբեռնելու մտայնությունից (դա կա, իհարկե, բայց հասարակ ժողովուրդը հեռու է իրեն նման ճոխություններ թույլ տալու մտքից):

Հիանալի մտահղացում է: Բա ի՞նչ, չայն ու կոֆեն էլ են շատ էս ժողովրդին. ի՞նչ կարիք կա. տարին մեկ անգամ գոնե մարդավարի սեղան կգցի:

Չայ ու կոֆեով թող յոլա գնա:

Այս կոչ-հորդորի հեղինակները հո չէի՞ն դիմելու իշխանությանը՝ վերջինից պահանջելով զսպել գնաճը, ստեղծել աշխատատեղեր կամ թալանը դադարեցնել, ինչի արդյունքում ժողովուրդը կկարողանա մի քիչ մարդավայել նշել տոները:

Դրա փոխարեն ընտրել են իշխանություններին խնայելու եւ ժողովրդին՝ քչով բավարարվելու, գոտիները ձգելու եւ չայ ու կոֆեով Ամանոր նշելու մասին կոչեր հղելու տարբերակը:

Նախագահականից սկսած մինչեւ գերատեսչություններ ու ամենաստորին օղակներ այս օրերին տասնյակ միլիոններ են վատնում գերատեսչական քեֆերի վրա, իսկ ժողովուրդն էլ պետք է բավարարվի չայ ու կոֆեով:

Մի մարազմատիկ հայտարարություն էլ լսեցի իրենց «քաղաքագետ ու փորձագետ» հռչակած անձանցից: Խոսքը Հայաստանում ապրող, ազգությամբ հայ «արեւմտամետների» մասին է:

Լրատվամիջոցները սրանց հարցնում են՝ ի՞նչ մաղթանք կհղեք, պատասխանում են. «2015-ին կցանկանայինք, որ Պուտինի ռեժիմը վերանար»:

Իրենց հայրենիքը՝ հեչ. այստեղ կարող է ամեն ինչ նույնությամբ մնալ: Կարևորը Պուտինի դեմ կռիվ տալն է՝ անշառ ու եկամտաբեր գործ։

Կիմա Եղիազարյան