-Կարևորը ոչ թե խոսքերն են, այլ գործը։ Իսկ որևէ կոնկրետ գործ, քայլ այս ուղղությամբ պարոն Օսկանյանը դեռ չի արել։ Ամեն դեպքում, գնահատականները, թեև Օսկանյանի շուրթերով, բայց տեղին են,- սեպտեմբերի 22-ի Վարդան Օսկանյանի ելույթը մեկնաբանելիս ասել է Լևոն Տեր-Պետրոսյանի մամլո խոսնակ Արման Մուսինյանը։

Նրա կարծիքով Վարդան Օսկանյանի բառերը, որպես միտք, առանձին վերցրած շատ տրամաբանական  ու ճիշտ են, բայց, «ցավոք, պարոն Օսկանյանը մի քիչ ուշ է այս մասին խոսում, դեռ ավելին՝ երկիրը ոչ ժողովրդավար դարձնելու և արտաքին խնդիրները նման բարդ հանգրվանի հասցնելու  գործում նա մեծ դերակատարություն է ունեցել»։

Վ. Օսկանյանի «Բողոքի ալիք պետք է բարձրացնել» խոսքերին անդրադառնալով՝ Արման Մուսինյանն ասել է, որ  դրանից հետևում է, որ. «Կամ վաղվանից պետք է զբաղվեք բողոքի ալիք բարձրացնելով, կամ փորձեք համագործակցել այն ուժերի հետ, որոնք այդ ալիքը բարձրացնում են»։ Արման Մուսինյանի համար անհասկանալի է նաև՝ ինչ է նշանակում բողոքի ալիք բարձրացնել, սակայն չիմանալ դրա մեխանիզմները։

Ինչ վերաբերում է «Հնարավո՞ր է, որ Վ. Օսկանյանը նախապատրաստում է Ռոբերտ Քոչարյանի վերադարձը քաղաքականություն» հարցին, Արման Մուսինյանը պատասխանել է, որ այդ ուղղությամբ ինքը չի մտածել, սակայն համոզված է, որ ժողովուրդն ամեն ինչ անելու է, որ նա իշխանության չգա։

7or.am