Հարցազրույց «Չե՛ք անցկացնի» նախաձեռնության անդամ, քաղաքագետ Արմեն Գրիգորյանի հետ

–Մոտ մեկ ամիս առաջ ստեղծվեց «Չե՛ք անցկացնի» քաղաքացիական նախաձեռնությունը։ Այսօր արդեն որքա՞ն մարդ է անդամագրվել, և ի՞նչ գործունեություն է առաջիկայում ծավալելու նախաձեռնությունը։

–Հաշվի առնելով սահմանադրական փոփոխությունների խնդրի առանձնահատկությունը՝ «Չե՛ք անցկացնի» քաղաքացիական նախաձեռնությունն աշխատում է այս փուլում ոչ թե մարդկանց անդամագրել շարժմանը, այլ հանրության լայն շերտերի հետ աշխատել՝ նրանց տեղեկացնելով սահմանադրական փոփոխությունների վտանգի մասին: Այս փուլում նախաձեռնության մասնակիցների թիվը բավականացնում է այդ աշխատանքը կատարելու համար: Առաջիկայում ևս փորձելու ենք աշխատել նույն ձևաչափով, քանի որ Սերժ Սարգսյանը հետաձգել է սահմանադրական փոփոխությունների մեկնարկը: Մենք այս ժամանակն օգտագործելու ենք հանրային լայն շերտերի հետ աշխատելու համար:

–Ինչպես հիշատակեցիք, Սերժ Սարգսյանը սահմանադրական փոփոխությունների գործընթացը հետաձգեց մինչև փետրվար–մարտ։ Ինչո՞վ եք դա պայմանավորում։

–Հետաձգումը պայմանավորված է հանրային ու քաղաքական ճնշումներով: 40 հազարից ավելի մասնակիցներով 2 հանրահավաքները ստիպել են Սերժ Սարգսյանին այս պահին հրաժարվել սահմանադրական փոփոխության արկածախնդրությունից: «Չե՛ք անցկացնի» նախաձեռնությունը կարևոր է գնահատում այս հետաձգումը, սակայն համոզված ենք, որ պետք է շարունակել բոլոր մակարդակներում աշխատանքը, որպեսզի Սերժ Սարգսյանը վերջնական հրաժարվի փոփոխություններից: Այս փուլում դեռ վտանգ կա, որ Սարգսյանը կարող է ցանկացած պահի սահմանադրական փոփոխությունների մեկնարկը տալ, եթե տեսնի, որ թուլացել է ճնշումը:

–Այսինքն, ո՞ր դեպքում Սերժ Սարգսյանը վերջնականորեն կհրաժարվի իր այդ մտադրությունից։

–Սահմանադրական փոփոխությունները մեկ նպատակ են հետապնդում՝ վերարտադրել Սարգսյանի իշխանությունը: Մեկ անեկդոտ կա, որը լավագույնս նկարագրում է սահմանադրական փոփոխությունների իրական նպատակը: Ասում են՝ Սերժ Սարգսյանը հավաքում է հանրապետականներին ու սահմանադրական փոփոխությունների հանձնաժողովին և ասում. «Ուզում եմ Հայաստանում էլ լինի՝ ինչպես Ղազախստանում, ու ես Նազարբաևի նման ղեկավարեմ մինչև մահ»: Հաջորդ օրը հանձնաժողովի նախագահ Գագիկ Հարությունյանը գալիս է Բաղրամյան 26՝ սահմանադրական փոփոխությունների նոր փաթեթով, որում նշված է լինում. «Սերժ Սարգսյանը կղեկավարի Հայաստանը մինչև Նազարբաևի մահը»: Իրականում հանձնաժողովի հրապարակած վերջին հայեցակարգը ևս ապացուցում է, որ սահմանադրական փոփոխությունների միակ նպատակը վերարտադրությունն է: Եվ քանի որ փոփոխությունների միակ նպատակը վերարտադրությունն է, ապա Սարգսյանը կհրաժարվի դրանից միայն այն ժամանակ, եթե տեսնի, որ այդ փոփոխությունների դեմ համախմբված ուժեր կան. միայն քաղաքական ճնշումների միջոցով է հնարավոր ստիպել նրան հրաժարվելու սահմանադրական փոփոխություններից:

Հարցազրույցը վարեց Արեգնազ Մանուկյանը