Հարցազրույց ՀՅԴ Բյուրոյի ներկայացուցիչ Հրանտ Մարգարյանի հետ

-Սեպտեմբերի 18-ին կայացած Հայ ազգային կոնգրեսի հանրահավաքի ժամանակ Լևոն Տեր-Պետրոսյանը հայտարարեց, որ սպասելով Հայաստանի մյուս քաղաքական ուժերի ակտիվացմանը և ասպարեզը ժամանակավորապես տրամադրելով նրանց՝ Կոնգրեսը չի հայտարարում իր հա­ջորդ հանրահավաքի օրը։ Ըստ Ձեզ՝ ինչո՞վ է պայմանավորված Լևոն Տեր-Պետրոսյանի նման որոշումը։

-Դա նույնն է, երբ Գյուլին հրավիրեցին Հայաստան, և ինքը դադարեցրեց նստացույցը Հյուսիսային պողոտայում։ Կարծում եմ՝ մեկը պահանջում է, որ դադարեցնի, որովհետև ընթացքը նրանց սրտով է, որոնց համար աշխատում է Լևոն Տեր-Պետրոսյանը։

-Այսինքն, Լևոն Տեր-Պետրոսյանն, ըստ Ձեզ, պատվե՞ր է կատարում, համաձայնությա՞ն է եկել։

-Ինձ չի հետաքրքրում՝ կոնկրետ պատվիրատուն ո՞վ է, կոնկրետ որտե՞ղ է համաձայնությունը, բայց ես հասկանում եմ՝ նրանք, ովքեր շահագրգռված են հայ-թուրքական հարաբերություններն այս պայմանագրով հաջողացնելու հարցում, դրանք են, ինչը Սերժի և Լևոնի պարագայում կարող է նույնանալ։

-Լևոն Տեր-Պետրոսյանը հայ-թուրքական հարաբերությունների կարգավորման հարցում համամի՞տ է Սերժ Սարգսյանի հետ։

-Այդպես եմ կարծում, որովհետև երեկ լսեցի, որ իրենցից մեկն ասաց, որ իրենց կարևորագույն խնդիրն այսօր 21 քաղբանտարկյալներն են, ոչ թե հայ-թուրքական հարաբերությունները, ոչ թե մեր վաղվա օրը, ապագան, մեր մտահոգությունները, որ այսօր ունենք, և վաղվան են վերաբերում։ Դա բավական խոսուն արտահայտություն է. ամեն ինչ բացահայտում է։ Նա ասում է, որ ազգային հարցերն իրենց համար առնվազն երկրորդական կարող են լինել։ Բացահայտեց իր կերպարը։

-ՀՅ Դաշնակցությունը պատրա՞ստ է լրացնել այն ազատ ասպարեզը, որը ՀԱԿ-ը համաձայնեց տրամադրել և սպասել։

-Այն դաշտը, որ մենք պետք է գրավենք, իրենցը չէր։ Այդ դաշտը հենց մերն է. միշտ էլ մերն է եղել։ Ուղղակի այսօր ժամանակն է, որ մենք կարողանանք ժողովրդին ոտքի հանել, ակտիվացնել։ Դա մեր միակ հենարանն է. մենք չունենք այլ պետությունների թիկունք, մեր ժողովուրդն է մեր հենարանը։ Մենք այդ ուղղությամբ ենք գնում, և ես վստահ եմ, որ կհաջողենք։ Հայաստանի քաղաքական դաշտը կբևեռանա ազգային հարցերի շուրջ։ Մոտակա ժամանակում այդպե՛ս է լինելու։ Եվ եթե այդպես է, ուրեմն կարծում եմ, որ մենք կարևոր դերակատարություն ենք ունենալու այդ հարցում։

-Իրերի այսպիսի դասավորվածության պայմաններում «Հայ ազգային կոնգրեսը» ե՞րբ կհրավիրի իր հաջորդ հանրահավաքը։

-Եթե մենք հաջողենք, որ նախագահ Սերժ Սարգսյանը չստորագրի այս պայմանագիրը, Լևոնը կվերադառնա քաղաքական դաշտ։ Իսկ եթե ստորագրեց, երկար ժամանակ չի վերադառնա. պատճառ չի ունենա։

Զրույցը վարեց Արեգնազ Մանուկյանը