Հարցազրույց Արցախի «Ազգային վերածնունդ» կուսակցության նախագահ Հայկ Խանումյանի հետ

-Փարիզում ԼՂ հիմնահարցի կարգավորմանն շուրջ եռակողմ բանակցությունների ընթացքում Ֆրանսիայի նախագահ Ֆրանսուա Օլանդը հակամարտության կողմերին կոչ է արել սեփական ժողովուրդներին նախապատրաստել խաղաղության՝ ընդգծելով, որ ստստուս-քվոյի պահպանումն անընդունելի է: Ինչպե՞ս կմեկնաբանեք այս հայտարարությունը։
-Ինչպես ցույց է տալիս Ելիսեյան պալատի հաղորդագրությունը, Ֆրանսիայի նախագահը Սերժ Սարգսյանին և Իլհամ Ալիևին կոչ է արել Լեռնային Ղարաբաղի հարցով բանակցված լուծում գտնել միջազգային իրավունքի սկզբունքների և Մինսկի խմբի մշակած սկզբունքների հիման վրա: Կարծում եմ սա բավականին ծանոթ ձևակերպում է, որ մենք բազմիցս լսել ենք հակամարտության կարգավորման միջնորդ այս կամ այն երկրի նախագահի միջնորդությամբ կազմակերպվող հանդիպումների ժամանակ: Ժողովուրդներին համընդհանուր խաղաղության պատրաստելու կոչերը նույնպես նորություն չեն, այդ համատեքստում տարիներ առաջ նույնիսկ զգալի ջանքեր են ներդրվել՝ օգտագործելով նաև ժողովրդական դիվանագիտության ներուժը: Սակայն Ադրբեջանի կողմից ռազմատենչ հռետորաբանության որդեգրումը, սահմանային սադրանքները, դիպուկահարային պատերազմը, սեփական հասարակության դեմոնիզացիան և խաղաղության ծրագրերով զբաղվողների նկատմամբ ճնշումները ի չիք են դարձնում նախկինում գործադրված բոլոր ջանքերը:
-Ֆրանսուա Օլանդը նաև հանդես է եկել հակամարտության լուծման համապարփակ համաձայնագրի մշակման առաջարկով: Բնակացությունների նախաշեմին Ադրբեջանի ԱԳՆ ղեկավար Մամեդյարովը հայտարարել էր, թե իր երկիրը պատրաստ է նման փաստաղթի մշակմանը։ Դա պատահականությո՞ւն է, թե՞, այնուհանդրձ, մտորումների տեղւք տալիս է։
-Խաղաղության առաջարկներ բոլորն են անում, խնդիրն այն է, թե որո՞նք են պայմանները: Ադրբեջանն ամենաբարձր մակարդակով սովորաբար հանդես է գալիս պատերազմի կոչերով և ակնհայտ է, թե ինչ պայմաններով է Մամեդյարովը կամ Ալիևը խաղաղություն ցանկանում: Նախորդ պատերազմի փորձը ցույց է տալիս, որ այս հակամարտությունում խաղաղություն հաստատելու միակ կարող ուժն Արցախի պաշտպանության բանակն է: Ինչքան հզոր լինեն հայկական զինված ուժերը, այնքան ամուր կլինի խաղաղությունը: Սա աքսիոմա է, որին հստակ տիրապետում են Արցախի բնակիչները, և որը հերթական անգամ երևաց 2014թ. օգոստոսյան սահմանային միջադեպերի ժամանակ:

Հարցազրույցը վարեց Մերի Մովսիսյանը