«NewsBook»-ի զրուցակիցն է քաղաքագետ Երվանդ Բոզոյանը:

-Պարո՛ն Բոզոյան, սահմանադրական փոփոխությունների վերաբերյալ Սերժ Սարգսյանի վերջնական դիրքորոշումը հայտնի կլինի փետրվար-մարտ ամիսներին: Ըստ Ձեզ՝ սա հետքա՞յլ է Սերժ Սարգսյանի կողմից:

-Բնականաբար, այս որոշումը կայացվել է հոկտեմբերի 10-ի հանրահավաքի արդյունքում, և, ըստ էության, Սերժ Սարգսյանը փորձում է «թայմ-աութ» վերցնել: Սերժ Սարգսյանը շատ լավ գիտի, որ եթե պաշտոնապես ստորագրի այդ փաստաթուղթն, ապա դա էապես կլարի երկրում քաղաքական իրավիճակը, և ինքը փորձում է խուսափել ու 4-5 ամսով հետաձգում է այդ խնդիրը: Փորձում է հասկանալ, թե այս շարժումը ի՞նչ աստիճանի կհասնի: Այսինքն, Սարգսյանի համար կարևոր է, թե այս շարժումը կարո՞ղ է մարել մի քանի ամիս հետո, թե՞ կարող է է՛լ ավելի լրջանալ: Սերժ Սարգսյանն ամեն ինչ կանի, որպեսզի այդ շարժումը մարի, դրա համար կօգտագործի իր բոլոր մեթոդները: Կփորձի օգտագործել բոլոր այն մարդկանց, ովքեր քննադատում են այս շարժումը: Ըստ էության, Սերժ Սարգսյանը փորձելու է մոբիլիզացնել այն քաղաքական դաշտը, որը գոնե արտաքուստ իրեն ընդդիմադիր է ներկայացնում: