Հարցազրույց «Ազգային համաձայնություն» կուսակցության նախագահ Արամ Հարությունյանի հետ

–Ի՞նչ ցույց տվեցին «եռյակի» մարզային հանրահավաքները։

–Ցույց տվեցին, որ ժողովուրդը ոգևորված է, և պատրաստ է իշխանափոխության ընթացքին։ Ընդ որում, որքան էլ իշխանությունները փորձեցին տեղական տարբեր «արջուկների» միջոցով խանգարել, բայց ժողովուրդն այդ հանրահավաքներին եկավ, և չնայած խոչընդոտներին՝ ոգևորությունն ակնհայտ էր։ «Եռյակն» այդ հանրահավաքներով ցույց տվեց, որ գնում է իշխանափոխության, և ակնհայտ է, որ քաղաքական ուժերը հոկտեմբերի 10–ին պետք է ցույց տան՝ միասնական են։ Չհաշված չնչին բացառությունները, որոնք, կարելի է ասել, քաղաքական վարձու ինքնասպաններ են, նաև իշխող կուսակցությունը, մնացածը, համոզված եմ, աջակցելու է «եռյակին»։

–Իսկ կոնկրետ ի՞նչ ակնկալիքներ ունեք Ազատության հրապարակում այսօր կայանալիք ԲՀԿ–ի, ՀԱԿ–ի և «Ժառանգության» հրավիրած համապետական հանրահավաքից։

–Համոզված եմ, որ նույնիսկ այսօր ոչ ոք չի կարող ասել, թե որքան լավ կարող է անցնել հանրահավաքը, որովհետև այն աջակցությունը, որն ունի երկրի ճակատագրով մտահոգված ընդդիմությունը, ոչ միայն «եռյակը», ձնագնդիի էֆեկտով մեծանալու է, և ձևավորվելու է իշխանափոխության խնդիրը։ Միակ լուծումը Սերժ Սարգսյանի հրաժարականն է, և համոզված եմ, որ «եռյակը» նաև ընդլայնելով իր ֆորմատը՝ կհանգի այդ հարցին։ Մնացած բոլոր լուծումները կոսմետիկ են, և մենք նաև տեսնում ենք իշխանությունների տագնապը. տարբեր հեռուստաընկերություններով մարդկանց են կանչում, որոնք փորձում են վարկաբեկել «եռյակին» և հանրահավաքի գաղափարը, կեղծ օրակարգեր են առաջ քաշում՝ ԵՏՄ պայմանագիր և այլն։ Հայաստանի ողբերգությունը ոչ թե մեր արտաքին ուղղություններն են, այլ ներսի քաղցկեղը, իսկ քաղցկեղի համար կարևոր չէ՝ այն ունեցող մարդը շրջում է «Համմերո՞վ», թե՞ «ԳԱԶ31»–ով։

–Իշխանությունը պատրա՞ստ է գնալ զիջումների։

–Համոզված եմ դրանում. նաև համոզված եմ, որ Սերժ Սարգսյանի հետ ոչ մի հարցով չպետք է բանակցել։ Միակ հարցը ժամանակային քարտեզն է, թե նա ինչպես պետք է հեռանա «ապահով ծերության»։ Ժողովուրդն այդ օրակարգը թելադրելու է «եռյակ» ասեմ, թե ազգային համաձայնության դաշինքին։ Ի դեպ, համոզված եմ, որ իշխանափոխությունն անցնցում է լինելու, որովհետև իշխանությունն այդ ռեսուրսը չունի. հասարակ մարդուց մինչև զինվորական, ազգային անվտանգության աշխատակից, մեծահարուստ... բոլորը դժգոհ են։ Չհաշված Սերժ Սարգսյանի կողքին գտնվող մի քանի մարդկանց՝ մնացած բոլորը դժգոհ են, և այնպես չէ, որ ինչ–որ մեկը փորձելու է դուրս գալ ժողովրդի ընդվզման ալիքի դեմ։ Համոզված եմ, որ այդ ամենը շատ երկար չի տևելու, և սկիզբ է դրվելու ազգային համաձայնության նոր շարժման՝ «եռյակի» գլխավորությամբ։ Ղարաբաղյան պատերազմում հաղթանակ տարած սերնդի վրա է, կարծես, այն Հայաստանի ստեղծումը, որը հետո մենք ժառանգելու ենք մեր զավակներին և թոռներին։

Հարցազրույցը վարեց Արեգնազ Մանուկյանը